Khualzin hîp tura inpho lan thiam

Tourism Minister chuan tun hnaiah Tourism Directorate tlawhin, department official-te nen an inkâwm a; Mizoramin tourism lamah theihna a neih ṭhat thu te, tlawh châkawm tura Mizoram pho chhuah a ngaih thu te, rurel (infrastructure) siam belh ringawt a nih ber loh thute a sawi. Tourism department hlawhtlinna chu khualzin zat aṭanga teh tur a nih thu a sawi bawk.

Kum khat chhungin state pawn, India ram chhung leh ram pawn aṭanga Mizoram rawn tlawhtu tam ve viau tawh mah se, a tam ber chu hna leh tih tur pawimawh neih vanga rawn lut an ni a, tourist kan tih, khualpáng zina rawn zin ve hrim hrim hi chu an la tam lo hle niin a lang. Khualzin tam zawk an rawn luh theih nan ṭan lakna tur leh tih tur tam tak a la awm.

Hmarchhak state tam zawk hi Mizoram aia khualzin dawng tam zawk an ni a, state ṭhenkhat phei chu Mizoram nena khaikhin phak loh khawpa khualzin ngah an ni. Chutih laiin, ṭhenawm state-a khualzinte'n an tlawh ṭhin hmun tam tak chu Mizoram aia nep zawk a ni a, mahse, khualzinte'n an tlawh hut hut si.

Ṭhenawm state-a hmunhma, khualzinte'n an tlawh tam takte anga mawi mai ni lo, mawi zawk Mizoramah a awm nual. Chuti chunga Mizoram aia khualzin hîp zawk an ni tlat si hi ngaihtuah ngai lai a ni. Mizorama hmun mawi tak takte hi pawn lam mite hmuh tura pho chhuah thiam leh pho lan tam a ngai a ni.

Mi tam takin state pawn lam aṭanga khualzin hip tura pawimawh ber zinga an sawi fo chu zu khap loh a ni. Hei hi zaa za chuan a dik lo thei a, mahse, thui tak chu a dikin a rinawm. Kan ram hi khualzinte'n tlawh tam se, khualzinte aṭangin ram mipuite'n eizawnna leh hlâwkna nasa zawk hmu se kan duh tak tak a nih chuan zu khap chungchangah rilru zau zawk put a ṭul ang.

Khualzin tam zawk hîp turin sorkar, pawl leh mipuiin mawhphurhna kan nei vek mai. Sorkarin khualzinte tlawh hip lehzual turin chak zawk leh ṭha zawka hmunhma an buatsaih a ṭul a; kohhran, pawl leh mipui pawhin rilru zau zawk kan put a, khualzin dawngsawng tura rilru lam kan buatsaih a ngai.

Tourism department hi khualzin chungchanga mawhphurhna nei sang ber an ni àwm e. Khualzin buaipui te, khualzin hîp tura ṭan lak te, khualzinte tana remchang siamte hi an tih tur pawimawh ber zinga mi a ni. Mizoramin khualzin nei tlem viau ta se, Tourism department chu a hlawhchhamah ngaih theih a ni hial ang. Nasa lehzuala ṭan an lak a ngai e.