Kuhva tawlhrûk man sa lilàm leh hralh

Ram dang aṭanga dan loa kuhva lak luh man zinga Kolasib district-a dah khawl eng emaw zat tun hnaiah lilàm a ni a, lilàmna chhángtu mi pali zinga lei tura thlante'n an phur chhuak meka sawi a ni.

Kuhva rah phurh chhuah chungchangah epty party nia hriatte aṭangin a rûka phurh chhuah ni àwma thu thehdarh a awm zui a, politics-a inbeihna a awm zui a; Kolasib District Magistrate-in April 21, 2025 khan a sawifiah.

Magistrate tarlan danin, kuhva rah lilâmte chu Kolasib District Court-in tihral tura District Magistrate kuta a dah tawhte a ni. Court thu bawhzuiin Magistrate leh Police hotute'n kuhva tihral dan tur an ngaihtuah a; phûm bo, hâl leh lilàm/hralh zingah lilàma hralh chu remchang berah an ngai a ni.

Kolasib District Magistrate leh sorkar official dangte'n kuhva rah man sa liláma hralh an rêl hi thlirna pakhatah chuan thil àwm tak a ni. Hralh zo vek ta se, sorkar sum báwmah cheng tam tak an chhûng lut theiin a rinawm a, sum leh paia harsa ve tak Mizoram sorkar tan a hlu hle ang.

Thlirna dang aṭanga thlir erawh chuan, ram dang kuhva dan loa tawlhruk sorkar leh mi dangte'n an man sa sorkar vêkin a hralh leh si hi thil àwm lo leh mawi lo tak a ni.

Ram dang kuhva dan loa lak luh leh tawlhrûkte hi a kal dan pangngaiah chuan Mizoram páwn lamah phurh chhuah nghal zel a ni a, Mizoramah a chámbáng lêm lo. Kuhva hi mihring tana hlauhawm a ni hran lo a, ruihhlo/ruihtheihthil anga mihring nun nasa taka tichhe thei a ni lem lo. Ruihhlo leh ruihtheihthil dangte kawl, zawrh, lei leh ei/in khap a nih laiin, kuhva erawh chu khap a ni lo.

Kuhva hi thil ṭha lo lutuk leh thil pawi ni lo mah se, ram dang kuhva lak luh leh tawlhrûk erawh dan bawhchhiatna a nih avangin man theih a ni a, man a ni ṭhin. Man chhanah hian, dan bawhchhiatna a nih piah lamah, Mizorama kuhva chingtute'n ṭha taka an kuhva tharte an hralh theihna tura hmalakna a nihna chen pawh a awm àwm e.

Kuhva tawlhruk a kal tluan laia a chhuahna lam thoa kuhva tawlhrûk man sa hralh chhuah leh tlat si hi a mawi lo a, a 'fair lo' deuh bawk. Chuvangin, kuhva rah man sate hi lilàm loin, hralh loin, tihral dan kawng dang zawn ni se mipui rilru a dam tlang zawkin a rinawm. Kuhva tawlhrûk hralhna aṭanga sum hmuh theihte chu sorkar pawhin a ît loh a ṭha.

Opposition party-te pawh sorkar beihna tur an zawnnaah hian an fimkhur a ngai; thil chiang zawk hre hmasa ṭhin se, thu dik tâwk lo hmanga mipui rilru hruai tum loin, thu dik tak hmangin sorkar beih ṭhin tur a ni.