Sawhthingah sorkar ṭang nasa rawh se

Mizoram sorkar chuan a thawh hnihna atan April 22, 2025 khan Mizorama sawhthing tharte kg. khat Rs 50 zelin a lei ṭan leh ta a, a lawmawm. Sorkar leh sawhthing lei buaipuitute nasa taka an ṭan a, chak zawka an lei a ngai a ni.

February 20, 2025-ah sawhthing lei ṭan a ni a, a thawh khatnaah hian an lei tam lo hle, Mizorama sawhthing thar zawng zawng aṭangin 20% pawh an la lei tling loa sawi a ni. Sawhthing lei tawh dan hi Mizoram mipui tam ber, sawhthing hralh tur nei leh nei lote beisei ang chu a ni lo hle tih a chiang.

Sawhthing la lei tlem viau chungchang leh a kaihhnawih thil hrang hrangtea sorkar duhkhawp lohna leh sawiselnate hi eptu party-te'n sorkar an beihna ringawt a ni lo. Political party-a inhnamhnawih rêng rêng lote mi tam tak pawhin tuna sorkarin sawhthing a lei dan hi an sawisel a ni.

Chutih rualin, opposition party-te hi chu sorkar lai sawisel rêng rênga hmanhlel an ni a, thu dik tâwk lo nen lamin an chêt châng a awm a ni mai thei. Sorkarin sawhthing lei thei loin, kut hnathawktute'n sawhthing hralh thei lo se, sorkar lakah thinrim se tih hi an duh dan nia a lan cháng pawh a awm. Hetiang hi eptu party-te rilru puthmang leh chêt duh dan a ni thei tih mipuiin an hriat a ngai ve ang.

Sawhthing lei thawh hnihnaah hian thawh khatna anga lei huk loin, a tahtawla lei tum a ni tih a ni. Hetiang hi an kal dan a nih chuan a thawh khatna ai pawhin an lei muang lehzualin a rinawm a; kut hnathawktute rilru put zui dan tur leh an awm zel dan tur sawi lâwk a harsa viau mai.

Agriculture department hotute chuan, Mizoram sorkar sum tam tak hum zawnga sawhthing lei an tum thu leh sawhthing lei khawm sate chu man to zawka hralh vek tum thu an sawi a; hetianga an ti thei a nih chuan thil ṭha tak pawh a ni ang.

Chutih rualin, tuna sorkar mekin inthlan lai vela an intiamnate ngaihtuahin, hlêp neia sawhthing hralh chhuah leh hi ngaih pawimawh hmasakah leh thupui berah neih tur niin a lang lo; kut hnathawktute sawhthing thar leisak vek hi ngaih pawimawh ber tur leh tih tur hmasa a ni. A pawimawh ber chu kut hnathawktute'n sawhthing an tharte ṭha tak leh tluang taka an hralh a ni a, hei hi ngaih pawimawh ber ni rawh se.