Boxing Day leh Mizote thilpek

Vawiin hi December 26 a ni a, Krismas tuk chiah hi khawthlang lamah chuan Boxing Day tiin a hming an vuah. He ni hi mihausa leh thiltithei zawkten an hnuaia hnathawkte chawlh an pek bakah thilpek an pekna ni a ni ṭhin a, tun hnu zelah thilpek inpek tawnna ni anga hman ṭhin a ni.

Mizote pawhin Krismas thilpek inpek tawn kan uar tawlh tawlh a, ṭhian ṭha leh chhungkhat hnaite thilpek kan inpe a, mi tam takin Krismas hi chanhai leh mi harsa zawkte ṭanpuina hunah  an hmang ṭhin. Kohhran, mimal bakah pawl leh ṭhianhoin ṭanpui ngaite ṭanpuina remchangah an hmang a, kan intih hmuh zel niin a lang a, a lawmawm hle a ni.

Hetihlai hian tun hmaa Mizo zia ni lo tak, midangte kan ṭanpui chanchin puanzar chiam kan ching ta leh midangte kan ṭanpuilai thlalak thehdarh kan ching chho ta erawh Mizo tihah a inhmeh lo hle.

Politician zingah an thil tih ṭhat puanzar loh hläu zek zek an awm ṭhin a, chu mite tihhmuh nge ni social media-in a ken tel zawk, mahni thil tih ṭhatah pawh mirethei zawkte ṭanpui chanchin kher puanzar duh kan pung zel a, thil ṭha ber a ni lo ang. Pawl thil tihte a nih chuan puanzar awm tawk a awm a; nimahsela a dawngtute mualphona ni tel thei zawnga publicity kan uar ta lutuk hi chu kan inenfiah tlan a ngai.

Khawvelin thilpek inpek tawn nia an hman Boxing Day a lo thlen hian, Mizote hian midangte ṭanpui intihhmuh thar zel ila, tun hmaa kan pi-pute zia hre rengin mi mit hmuhah kher ni lo ṭanpui ngaite ṭanpui hi i zir chhuak thar ang u.

'Sem sem dam dam, ei bil thi thi' ti ṭhin hnam kan nih hre rengin, midangte ṭanpui turin inpe thar ila; a langsara puangzar kher loa thilpek pek hi kan Bible zirtirna nen pawh a inmil tih i hre reng ang u.