ADC sorkar nghet lo ṭhin hi

Lai Autonomous District Council term kal mekah sorkar siam mektu ZPM party-a MDC pahnihin BJP an zawm avangin BJP chuan MNF thawhpuiin sorkarna siam an tum a; chutih laiin, BJP zawm thartu MDC pahnih zinga pakhat chuan a thu zûkin ZPM-ah a awm zui leh dawna sawi a ni bawk.

ZPM MDC ṭhenkhatin BJP an zawm avang hian BJP leh MNF MDC-te chuan LADC-ah sorkar siam tumin hma an la a, chief executive member (CEM) tur pawh an thlang a; Congress party MDC awm chhun (pakhat)-in thlàwp a tum bawka sawi a ni.

LADC-ah tuna sorkar ding lai hi a a ding zui thei lo a, BJP leh MNF inṭâwm sorkar thar a ding a nih chuan LADC term kal mekah sorkar thar a din ṭum ngana a ni ang.

December 2020-a LADC inthlanah MNF party chu hneh takin an chak a, sorkar an siam. Inthlan hnuah ṭum li sorkar lak luh a ni tawh a; ṭum li CEM lak luh ni tawhin, a mihringah chuan mi hrang pathum an ni. LADC chauh ni loin, MADC leh CADC-ah pawh sorkar a inthlak fo tawh ṭhin.

District council sorkar a tlûk ṭhin chhan ber chu MDC-te'n thlan tlin an nih laia an awmna party chhuahsana party dang an zawm ṭhin vang a ni. Party awmna an thlak fo chhan pui ber chu - party awmna thlak thei lo tura khuahkhirhna dan (anti-defection law) a awm loh vang a ni a; suma inthlêmna vang a ni fo ṭhin niin a lang bawk.

Anti-defection law ang chi hi ADC ṭhenkhat chuan an nei a, mahse, chu dan chu MDC-te chungah lekkawh a nih pawhin law court-ah an khing a, a khingtute an chak zel. Chuvangin, ADC-te'n anti defection law an neih ve hi chu a hman theih tak tak loh a ni mai thei.

Heti taka LADC sorkar a nghet thei lo te, sorkar lai nam thlûk a, sorkar thar lak luh a ngai reng mai hi a zialo hle. District pum ang te, a district council ang leh a hnam ang pawhin thil zahthlak a tling.

ADC-a MDC-te party danga an pên theih lohna dan hi siam a harsa viau a ni mai thei. Chutih rualin, khuahkhirhna dan a awm lo hi harsatna tam tak siamtu a nih tlat si avangin tih dan kawng zawn erawh a ṭhain a rinawm.

District council sorkar a din ngheh theih nan MDC-te'n rilru mumal leh ze nghet an neih a pawimawh a, MDC an nih theih chhan - candidate-a dahtu party leh thlang tlingtu mipui lakah an rinawm a pawimawh. Political party-te pawhin ADC-te lakah rilru thianghlim tak pû se, sorkar ding ṭha hle hle lai tihbuai ṭhin lo se a ṭha hle ang.