Lengpui Airport-a venhimna hna

26th April, 2025

Mizoram police-te'n kum 20 chuang Lengpui Airport-a venhimna hna chi hrang hrang an thawh hnuah an thawk dawn ta lo a; Ministry of Home Affairs ruahman angin April 24, 2025 aṭang khan Central Industrial Security Force (CISF) mi leh sate vekin an enkawl ta.

Lengpui Airport-a venhimna hna CISF hnena hlanna inkhawm April 24-a neihah Mizoram DGP chuan, CISF-in airport an enkawl tur chuan venhimna lamah rah ṭha a chhuah dawn thu leh Mizoram mai bakah, hmarchhak bial tan himna tam tak a thlen dawn thu a sawi. DGP sawi ang tak hian Mizoram leh ṭhenawm state-te him lehzualna tur ni ngei se a duhawm hle.

Chinchang hre zawkte sawi danin, CISF-te hian India rama airport 69 ven hna an thawk mek a ni a, airport lian tak takte an veng a ni. Chungah chuan security an kalpui dan a ṭha thawkhat viaua sawi a ni a; mi lian leh ta an sawi hran lo.

CISF-te hi sorkar hmun pawimawh, factory, plant, airport leh thil dangte vengtu atana lak leh a bika zirtir an ni a; Lengpui Airport nen India rama airport 69-ah venhimna hna an thawk mek a, kan airport neih chhun hian him lehzual phah ngei se.

Mizoram police-te hi an ṭha em em a, mahse, Mizo leh Mizo na nâ nâ chu inhriatthiam chin neih maite a awl a, inhmelhriat sa karah a awl lehzual. Thil ṭhenkhatah chuan security duty (police) hmelhriat nei ṭha deuhte'n hriatthiamna zau zawk an nei thei bik riau tawh ṭhin pawh a ni mai thei.

CISF-te hi an tih tur chin leh tih loh tur chin chiang taka hriaa ti ṭhin an nih avangin Mizoram police-te ai chuan namnûl leh pal luih an harsa deuh ngeiin a rinawm. Khirh zawk leh khawng zawka an kal a nih pawhin vuivaina atan leh CISF-te hnawk tih phahna atan hman loh a ṭha ang.

Engpawhnise, Lengpui Airport-ah Mizo ni lo, CISF mi leh sain venhimna hna an kengkawng tawh a, an tih tur chinah khawng leh nghet takin an ding turah ngai ila. Mizoram police-te an duty lai aiin airport-a inendik dan pawh an uluk lehzual turah ngai ila; tih tur a lo tam ta zawk deuh a nih pawhin Mizo mipuite'n kan hriat thiam a, hmasawnna tur zawka kan ngaih a ṭul dawn a ni.