State ramri buai leh inbiakna

State ramri buai chinfel dan tur chungchangah Mizoram leh Assam aiawhte chu April 25, 2025 khan Guwahati-ah an inbia a; official level-a inbiakna niin, state pahniha secretary ve ve hoin official-te an tel.

Inbiaknaah hian August 9, 2024-a minister level-a inbiaknaa thu dah tawh angin, ramri-ah status quo vawn chhunzawm zel ni se an ti a, ramri hnaiha DC-te bawhzui turin an dah. Ramri dep district-te tan cultural exchange programme nei tura lo rêl tawh pawh remchang hmasaah neih an rêl a ni.

Mizoram leh Assam ramri buai chinfel tuma state pahnih aiawhte'n inbiakna hun ṭha tak an hmang thei hi a lawmawm a; rah ṭha tak chhuahin, ramri buai chinfelna tura rahbi pawimawh tak ni ngei se a duhawm.

Inbiaknaa thu dah - ramri hnaiha status quo vawn (hmalakna neih loh ve ve) chhunzawm hi a pawimawh viau mai. Mizoram lam chuan status quo hi vawng ṭha zel thei ila; Assam lamin an bawhchhia a nih erawh chuan titawp tur leh nawr let turin huaisen taka hmalak vat zel ni se.

Inṭhian ṭhatna tura cultural exchange programme buatsaih te, Mizorama Chapchar Kût 2026 hmang tura sawm tihte pawh hi a ṭha hle mai a; tihhlawhtlin ngei ni se a duhawm. Thil tihho tam hian inṭhian ṭhatna leh inkungkaihna ṭha a siam ṭhin.

Chhungkuaah inhauh leh intihthiam loh chángte a awm ṭhin a; ṭhenawmte nena intihthinrim cháng pawh a awm ṭhin. Chutiang zelin ṭhenawm state Assam nen pawh inṭhenawm nih miau chuan inhmuh thiam loh cháng a awm ṭhin a, a la awm zel pawhin a rinawm. Inhmuh thiam loh cháng pawha remna kawng zawn a, inhriatthiam tawnna neih leh theih zel hi a ṭha a; chutiang tur chuan sorkar ang leh mipuite'n rilru zau tak kan put a ṭul.

Mizo pi pute chuan ṭhenawmte do ai chuan khaw sarih do a thlanawm zawk, an lo ti a; hei hi a dik thui viau. Assam hi kan ṭhenawm kumkhua tur an nih hmel a, kan mamawh tam tak, chi hrang hrang kan lak luhna kawng pawimawh a ni rengin a rinawm. Inmamawh tawn kan ni a, ṭhenawm ṭha kan nih tawn theih a ṭha hle.

State ramri buai chingfel tur hian minister level-a inbiakna pawh neih leh thuai ni thei se, sorkar hotute'n chak taka bawhzuiin hma la zel se. Assam lam an muangcháng deuh a nih pawhin Mizoram lamin hma la chak thei ila; nghaktu ni loa hma la hmasatu nih hi tlàwma lak tur chi a ni lo ang.