Lungleia kawngpui dan chungchang

MZP Headquarters, Lunglei chuan Mizoram sorkarah phût an neih avangin Aizawl-Thenzawl-Lunglei (ATL) kawng chu nimin zing aṭang khan tiam chin awm lo turin Pukpuiah an dang ṭan a, vawiin aṭang hian Hrangchalkawnah pawh NH kawngpui dan tel an tum nia sawi a ni. Kawngpui an dan hi Lunglei leh chhim lama pawl hrang hrangte'n an thlàwp thu an puang bawk.

ATL Road MZP-te'n an dan chhan ber hi ATL Road siamna tur sum cheng vbc 90.69 zinga vbc 45 hmun dangah pawh pên nia sawi vang a ni a; sum pawh pên chu ATL kawng siam nan dah lêt turin Mizoram sorkar an phût a ni.

Aizawl-Lunglei kawng hi Aizawl aṭanga Kanghmun South thleng chu a ṭhat thawkhat viau laiin, Kanghmun South leh Pukpui inkar a ṭha lo viau a, hmun tam takah lirtheia tlân hrehawm khawpin a chhia. Kawng ṭha loa an tlan rei tawh dan ngaihtuahin, tuna lungawi lohna an lantir hi ngaihdan pakhatah chuan a àwm viauah a ngaih theih.

A bikin Haulawng leh Pûkpui inkar hi tun hma aṭangin a ṭha hleithei lo a, siam a nih pawhin a tlo lo ṭhin. Kawng chhia avangin tun hma pawhin kawngpui danga sorkar nawr a lo ni tawh ṭhin bawk.

Lunglei lamah ṭum danga kawngpui dan leh lungawi lohna lantirah chuan kawng siam tura sorkar nawrna a ni tlangpui. Tun ṭuma kawng dan erawh chu kawng siam tura sorkar nawrna ni loin, kawng siamna tur sum awm tawh pawh pên dah lêt tura sorkar nawrna a ni.

Kawng ṭha neih duha Lunglei MZP ṭhahnemngaihna a fakawm a, ATL Road a ṭhat zawk theih nan hma la zui zel se. Chutih rualin, tun dinhmunah chuan kawng siamna tur sum cheng vbc 40 lai a la awm tho avangin, chumi hmanga kawng tlo ṭha chak taka siam turin sorkar nawr se a fuh zawk mah àwm e.

Sum awm sa hmanga kawng siam tur chin ṭha taka siam a nih theih nan bawhzui se, hmabak la awmte pawh siam a nih thuai theih nan bawhzui zel se a ṭha hle ang. Kawngpui pawimawh dan a nih hian mipuiin harsatna lian tak an tawh phah thei a, mipui nâwlpui ṭhat tlanna tur ngaihtuah zel ni se.

Sorkar pawhin uluk taka ngaihtuahna sêngin, a tih tur chin chak takin ti se. Kawngpui hial danga nawr a ni emaw, ni lo emaw, tih mai theih chu chak zawkin bawhzui se; tih theih lohah erawh chuan eng ang pawhin nawr se, tawlh loin nghet takin ding rawh se.