Sorkar hnathawk tan NOC lak a ngai
Firms & Societies Registrar chuan tun hnaiah hriattirna chhuahin, non governmental organisation (NGO) hruaitu ni turin sorkar hnathawkte tan sorkar aṭangin phalna, no objection certificate (NOC) lak hmasak a ngaih thu an tarlang.
Firms & Societies Registrar tarlan danin, Mizoram sorkara Vigilance department-in No.A.26011/2/2013-VIG dt 9th October, 2013 hmanga office memorandum a tihchhuah angin, sorkar hnathawk, non-governmental organisation (NGO)-a pawl hruaitu (office bearer leh executive member)-te'n sorkar aṭangin NOC an lak hmasak a ngai.
NGO hruaitu ni tura NOC la tur sorkar hnathawk chu group A & B gazetted officer an nih chuan Vigilance department-ah phalna dil tur a ni a, group B non-gazetted tan a awmna department-ah dil tur niin, group C leh D tan a thawhna head of department-ah dil tur a ni. NOC chu Firms & Societies Registrar-ah thehluh tur a ni bawk.
NGO-a hruaitu, sorkar hnathawk tan phalna (NOC) lak a ngai tih hi mi tam tak chuan an hre kher lo mai thei; tunah erawh chuan Firms & Society lamin an puanzar thar leh tâk avangin hre lote pawhin an hre tawh ngei ang.
Sorkar hnathawk tan NGO hruaitu ni tura sorkar aṭanga phalna lak ngai hi phurritah ngaih tur a ni lo a, an kawng tibuaituah leh sorkar hnathawk tihchêpnaah ngaih tur a ni hek lo. Pawl hmunpuia hruaitute mai bakah, khua leh veng hrang hranga NGO hruaitu zingah sorkar hnathawk an tamin a rinawm a; dan a awm a nih chuan dan anga tih mai tur a ni.
Pawl ang emaw, mimal ang emawa thil ṭha duh, mi dangte pawh thil ṭha leh dik ti tura beisei ṭhin, thil dik lo leh ṭha lo do ṭhin nih phei chuan sorkar dan zawm a, dan ang taka thil tih a ṭha ber. NGO-a hruaitu zinga sorkar hnathawkte chuan thuneitute aṭangin NOC lak ngei ni se, mimal, sorkar leh hruaitu nihna pawl tan thil ṭha zawk a ni ang.
NGO-a hruaitu nihna hi hman sual theih a ni a, hmang sual pawh an lo awm zauh zauh tawh mai thei. Sorkar hnathawk tan sorkar policy leh hmalaknate sawisel leh dodal tur a ni lo a; chutih laiin, sorkar hnathawk zinga ṭhenkhat chuan NGO-a an nihna hmachhuanin sorkar hmalakna leh thil tihte an lo do tawh ṭhin mai thei bawk. Hetiang hi tun hmain a lo awm tawh a nih chuan, tun hnuah chuan awm tawh lo se a ṭha hle.