HSLC Examination 2025 result

MBSE chuan HSLC Examination 2025 result a tichhuak ta a, zirlai ṭhahnem tak an hlawhtlin laiin, hlawhtling lo pawh eng emaw zat an awm.

MBSE hian nikum HSLC 2024 aiin chawlhkar hnih chuangin result an tichhuak hma zawk a, tluang tak leh rang taka result ṭha tak an tichhuak thei hi a lawmawm. Exam buaipuitu zawng zawng, MBSE-a thawk te, exam leh result buaipuitu zirtirtu te, sorkar hotute ṭanrualna, inpekna leh thawhrimna a fakawm.

HSLC 2025 result enin, kawng hrang hrangin nikum aiin kuminah hma kan sawn tih a lang. Zirlai exam zawng zawng pass vekna sikul kuminah 107 awmin, nikum aiin 22-in a tam zawk a, fail vekna sikul kuminah 13 awmin, nikum aiin pangain a tlem zawk. Hengte hi thil lawmawm lam vek a ni.

Chutih laiin, kumin HSLC-a ti ṭha zualte mark hmuh zat erawhin nikum lama ti ṭha zualte mark hmuh an pha lo hlawm thung a; tuna pawl 10 zir mek, nakkuma HLSC exam turteah topper-te mark hmuh zatin hma a sawn leh theih nan ṭan lak ni se a duhawm.

Kumin HSLC aia result ṭha zawk hi la neih theih a ni a, result ṭha lehzual nei turin kan ṭang tur pawh a ni. Result-ah hmasawn zel turin MBSE bakah, Mizoram sorkara zirna lama hotu te, zirtirtute ṭang sauh sauh zel se.

Chutih rualin, result ṭha, pass percentage sang ngawr ngawr erawh thil ṭha ber a ni lo thei ve tho a; pass tam ngawr ngawr (pass quantity) aiin zirlai pass-te quality a pawimawh zawk mah mai thei. Thuneitute leh mawhphurhna ngaihtuahna uluk taka sêng chungin kalpui chi a ni ang.

Tunlaia mi tam tak buaipui chu ṭhalaite leh zirlaite kal zel dan tur a ni. Mi tam tak chuan zirlaite hi an tuina lama kaltir a pawimawhzia leh a ṭulzia an sawi ṭhin. Hei hi thil pawimawh a ni a, zirlaite hi an tuina taka an kal hian hma an sawn chak ṭhin a; an tuina lama an kal theih nan nu leh pate pawhin an tui zawng an hriatpui a, an inhawn a, an kaihhruai a ṭul.

Hetih lai hian, tui zawng ringawt hi a ṭha ber a ni lo ve thei tho. Mahni leh chhungkua mai bakah, khawtlang leh ram hmasawnna leh ṭhatna zawk tur a nih chuan tui chawp tum a, tih hrâm hrâm a ṭul ve thei. Tih ngai lêm loh pawh tih ṭhan miau chuan a tui zui theih a; lehkha zirah pawh zir tama inchiah tam nâk nâk chuan a tui chawp theih a ni.