Ration card leh hlemhlêtna

Sorkarin ration card a siam thar Rs 20-a mipui khultir tur a nih laiin, Champhai district-a retailer thenkhatin Rs 20 lêt vel leh a lêt aia tam mahtea mipui khultir an awm thu sawi a ni a; a zialo tak zet.

Ration card khulna tur zat aia sanga khultir an awm thu sawi a nih chungchangah sorkarin hma a la nghal a; Champhai DCSO-in retailer-te chu ration card thar Rs 20 aia toa an hralh chungchangah May 2, 2025 ral hma ngeia insawifiah turin a hriattir a, Rs 20 aia toa an hralhna zawng zawng chu mipui hnena pe let vek turin a hriattir bawk. Hetianga sorkarin hma a la nghal hi a lawmawm hle.

Mizoramah eirûkna leh hlem-hlêtna (corruption) chungchang sawi a tam a; sorkara hotu - minister, MLA leh officer zingah corruption-a fihlim lo nia rin pawh mi eng emawzat an awmin a rinawm. Thil àwmloani hranlo.

Corruption sawi hian sorkara thuneitute hi rilruah a lang hmasa fo thin niin a lang a; chutih laiin, sorkara hotu lian ni lem lo, khawi emaw laia corruprion tih theihna remchang nei leh mipui zingah pawh eirûkna leh hlemhlêtnaa fihlim lo eng emaw zat an awm niin a lang.

Sorkar hotu lian zinga mi ni si lo zingah chuan tun hma ațanga tawhin retailer-te hi hlemhlêtna thil ti nasaa sawi an ni thin. Bûk dik loa hralh te, a chuangbâng hmun danga hralh leh thil dang dang sawi a awm fo.

Heng thil dik lote hi a tàwp theih nan sorkarin theihtawp a chhuah mek niin a lang a, a lawmawm tak zet a; thâ thlak loin theihtawp chhuah zel rawh se. Ration card khulna rate bituk aia toa khultirtute insawifiah tur leh rate bituk aia tam an lak chu pe let vek tura sorkarin a hriattir pawh hi thil tha leh lawmawm a ni. Retailer-te pawhin ram leh hnam leh mipui hma ngaiin dik takin thil ti zel rawh se.

Sorkara hotu sang leh officer-te chauh ni loin, sorkar hnathawk dangte, contractor leh supplier te, retailer-te leh mipui zawng zawng hian rilru chhungril tak ațangin eirûkna leh hlemhlêtna kan huat a, tih duh lohna rilru nghet kan neih vek a ngai.