Zirtirtu transfer & posting rules

Education Minister chuan zirtirtu transfer & posting rules siam mek a ni a, May 2025-ah hrual mûm hman an tum thu a sawi. Transfer & posting rules siam turah mipui tan ngaihdan thawh theihna hun hawn a ni dawn a, a duh tan ziakin ngaihdan thlente theih a nih dawn bakah, sawihona hun la buatsaih tur a nih thu a sawi bawk.

Sorkarin zirtirtute transfer & posting rule a siam mek hi a lawmawm a, thil ṭha tak a nih ngei a beiseiawm. Mipuiin ngaihdan an thawh theihna hun hawn a ni tur te, sawihona hun buatsaih tum a la ni leh zelte hi a lawmawm. Hengte hi sorkar inhawnzia tilangtuah a ngaih theih.

Zirtirtu chung-changah hian ngaihdan ṭha tak tak nei an tamin a rinawm. Ngaihdan mumal tak neite chuan ràl aṭanga sorkar thil tih dan sawisel ringawt loin, sorkarin hun a hawn hunah an ngaihdante thawh ngei se a ṭha hle ang.

Tuna kal danah chuan zirtirtu tan mahni khua ni lo, thingtlang leh hmun kilkhawr zawka awm a huphurhawm duh viau. A chhan chu–tunah chuan tihpuitu nei ṭha ve lo tan chuan an awmna hmuna awm ngar ngar a ni mai a; engtikah nge hmun nuam zawk emaw, mahni khuaah emaw, khawpui zawkah emaw an awm dawn sawi theih a ni lo.

Service ṭhenkhat chuan transfer & posting kalphung mumal tak an nei a; an awm theihna hmun zinga a kilkhawr berah pawh awm se, rei tak an awm dawn lo tih an hre chiang a, chuvang chuan huphurh lo takin an kal mai ṭhin. Hetiang hian college leh high school zirtirtuteah pawh tih ve theih ni se a ṭha hle.

Kohhran ṭhenkhatah chuan pastor/minister-te hian an awmnaa an awm chin tur an hre sa a, chumi mil chuan thil hrang hrangah an inruahman thei ṭhin. Sorkar zirtirtute pawh hian transfer & posting rules ṭha tak nei se, an post-a an awm chin tur hre lâwk thei se a ṭhain a rinawm. An awm chin tur an hriat lâwk chuan hmun kilkhawr zawka awm pawh an hreh lo ang a, chhungkaw inrêlbâwlnaah pawh thil ruahman a awlsam phah hle ang.

Sorkara zirtirtute tan transfer & posting rules ṭha tak siam a ṭul tak zet a, zirtirtu indaih loh lutuk leh indaih lutuk siamrema chinfel theihna ṭha tak a ni ang. Khawpuia zirtirtu awm tlûrh a, thingtlang lama indaih loh em em si pawh a reh phah theiin a rinawm.

Sorkar hian zirtirtute transfer & posting rules a buaipui mek hi chak takin kalpui se, a rang thei ang bera tihpuitlin a nih theih nan hma la rawh se.