Fai i chhunzawm zel ang

Mizoram hmun hrang hrangah Faina Hapta, 2016 chu khar a ni a; district hrang hrangah faina kawnga inelnaa tiṭhate hnenah lawmman sem a ni.

Faina chungchang hi tun hnaiah inzirtirna uar zawka kalpui mek a ni a, hei hi sorkar laipui lam Swachh Bharat hmalakna vang pawh a ni thei ang. Khawvela ram bâl leh ṭawp tia sawi ṭhin India ram tihfai tumin sorkar laipuiin ṭan a la a, India ram state hrang hrangah faina beihpui an thlak a, sum pawh ṭhahnem tak dah a ni.

India ram state dangte an fai tawk loh avangin Mizoram hi chu state bâl pawl kan ni ngai lem lo a, state dangte nena khaikhin ralah phei chuan India ramah chuan a ziaawm pawl tak pawh kan ni mai thei. Hetihlai hian fai hi inzirtir theih a ni a, sum sen belh vak lo pawha kan tih theih thil a ni a, tuna sorkar laipui hmalakna remchanga hmang hian thapui thawha beih hunlai tak a ni awm e.

Tunah chuan sorkar laipuiin remchang a rawn siam a, Swachh Bharat hnuaiah sum ṭhahnem tak dahin faina lama ṭanlak a tum. Hei hi Mizoram sorkar hian theitawp chhuahin bawhzui se, he thila sum lo kal zawng zawng hi a boa bang awm loin faina kawnga hmalakna atan hman ni se, Mizoramah danglamna lian tak a thlen theih ngei a beiseiawm.

Sorkar laipuiin ṭan a lak hma pawhin, faina kawnga inzirtirna hi kalpui a ni tawh. Sum tam tak sen belh ngai vak lo pawhin fai tura ṭan lak theih a ni a, tunah chuan sorkar laipuiin sum a dah ta. Kan sum hmuh hi a tlem lo a, ṭangkai taka hman a nih chuan Mizoram hmel hi thlak danglam thei tur khawp Swachh Bharat kal tlang hian sum dah a ni. Hei hi sorkar hian a hmang ṭangkai lo a nih chuan a pawi hle dawn a, Mizoram pum fai-na kawnga uar zawka kan infuihna hun ṭha-ah hmang ila, a taka fai tura ke kan pen ṭannaah i hmang ang.

Faina hapta kan hman ṭhin hi chu inzirtirna hun ang chauhah hmang ila, kum tluanin faina kawngah ṭan la zel ila, India rama state fai ber nih hi kan sorkar hian a tum tak tak a nih chuan tih theih loh a ni lo.