Kawngpui

Tunlaiin Mizoram hmun hrang hrangah kawng chhia avangin mipuiin harsatna an tawk a, kawngpui lûn zual ṭhenkhatte pawh kal harsa khawpin a chhe mek a ni.

Kuminah Mizoramah ruah tui a tla tam hle a, a tlak ṭan hma mai piah lamah tun thlengin a la han lo a ni ber. Hei hi kawng-pui chhiat chhan lian tak chu a ni ngei ang a, hei lo pawh sawi tur a tam ang. Kan ram leilungin a zir loh vang te, kan lung a chan ṭhat tawk loh vangte leh tlang rama kawngpui sial chawp ngai a nih vangin a chhak aṭanga min leh a chhuat tla bal avangin harsatna tam tak a awm thei.

Heti chung hian tun aia kawngpui ṭha zawk neih hi chu mipuite hian an phu a, Mizorama kawngpui tam tak hi a chhe hle a ni. Kawngpui ṭhenkhat hi chu a siamna a lo rei ve deuh tawh avangin a chhiat a hun tawh pawh a ni thei a; amaherawhchu kawngpui ṭhenkhat dang ve thung hi chu an siam dan a ṭhat loh avanga tlo lo a ni. A pawlh tur ang dik taka pawlh loh vang te, a phah tur lung chang ṭha an phah loh vang te, kawngpui siamna tura sum dah an hman ṭhat tawk loh vangte pawh a ni thei ang.

Engpawhnise sorkar tan kawngpui zawng zawng siam a remchang hrih lo a nih pawhin, kawngpui lûn leh pawimawha a chhe zual laite hi chu siam ṭhat a âwm khawp mai. Ruahtui hul hun nghah tih ringawt hi a fel tawk lo a, ruah a sur lai hian kawngpui zawh lo thei lo an ṭhahnem si a, lirtheiin a tuar a, mihring tan a hrehawm a, hun a hek em em bawk a ni.

Kum tin fur a thleng ṭhin tih hre chiangtu PWD lam hian theihtawp chhuah ve bawk mah se, tuna kan rama kawngpui dinhmunah hian mipui an lawm lo. Mihring tih theih bak khuarel thil a awm a, ruah tui tla tam lutuk tur hi chu ven rual a ni lo a, he ti chung hian inbuatsaih lawk theih thil tam tak a awm ve a, he mi kawngah hian ṭan lak thar a ngai a, kawngpui chhe lutuka hnutchhiaha ruah tui hul hun nghah ringawt hi chu mipuiin an tuar rei ta hle mai.