Khawtlang duty

Siaha SP office chuan tun hnai khan ‘Anti-Drugs and Role & Functions of VDP’ tih thupui hmangin awareness campaign an buatsaih a, MTP (Hqrs), Siaha Group YMA, MHIP Sub-Hqrs, Joint V/C leh ECM hqrs. aiawhte telin, VDP kalphung leh mawhphurhna hrang hrang an zirho.

Hmun ṭhenkhatah chuan Village Defence Party (VDP) hi ṭha tak leh chak takin a la ding a, hna ṭangkai tak tak an thawk a, khawtlang venghimtu pawimawh ber an ni. Hmun ṭhenkhatah erawh chuan VDP hi a ding mumal tawh lo a, khawtlangin ṭul an tih tawh loh vang emaw, a duty tur lam inhmuh loh vangte pawh a ni thei ang.

VDP pawimawhzia hre chiangtu khua leh veng chuan VDP chak tak an la nei zel a, anni hi khawtlang venghimtu pawimawh an nih piah lamah a khaw mite an nih nghal bawk avangin an remhria a, ṭhahnem an ngai a, tih tak zetin hna an thawk ṭhin. VDP hi tun hmaa zurui leh rukru mana vaw ṭhin anga ngaih ngawt theih an ni tawh lo a, tun hmaa sualna ni lo sualna tam tak a awm tawh bakah an hna hi a danglam chho ve zel a, tunah chuan VDP kalphung pawh a changtlung chho zel.

Siaha SP office-in hetianga inzirtirna hun an hmang hi a lawmawm takzet a, hei hi hmun dangah pawh kalpui theih se a
ṭha ngawt mai. Khawtlang tana ṭhahnemngai taka pen chhuakte hi a fing ber ber leh a dan hriate an ni bik lo a, hei vang hian chet sual changte pawh a awm leh zauh ṭhin. Hei vang tak hian VDP tinte hian an hna leh tih tur leh tih loh tur chin an hriat theih nan inzirna hun ṭha an mamawh a,
ṭha taka inzir chungin Mizoram khua leh veng hrang hrangte venghim turin VDP hi an kal zel se a duhawm hle.

Khaw tinah police an awm vek thei lo a, heng hmunahte hian sualna a lut lo a ni bik si lo a, VDP hi an ṭangkai zual a ni. Khawpui police tamnaah pawh a tak taka veng leh khua venghim tur chuan VDP-te hi an ṭangkai ṭhin a, dan hnuaiah fimkhur takin, huaisen tak siin VDP-te hian ke pen zel se a ṭha ang.