India-Pakistan boruakah phîlî lo ila

Pakistan-a inkulh nia hriat mi firfiakte'n April 22, 2025-ah Jammu & Kashmir chhung Pahalgam-a khualzinte an páwng kah a, mi 26 lai an thi. Hemi chhan lêt nan hian nimin zing khawvar hma khan India sipaite chuan Operation Sindoor tiin Pakistan ram chhung leh Pakistan occupied Kashmir (PoK)-a firfiak pawl hmunte an bei a ni.

India leh Pakistan inkar chhe mek avang hian India ram mipui an râlkhêl a; sorkar laipuiin state leh union territory tinte inbuatsaih turin a hriattir a, hei vang hian ram mipuiin an ngaihven zual niin a hriat.

India leh Pakistan inkar chhe mek hi mipui ngaihven ber pakhat a nih mek avangin media hrang hrangte pawhin an ngaihven a, an puangzar nasa. Traditional media-te mai bakah, social media hrang hrangah hmuh tur leh ngaihthlak tur a tam mai a, Mizote pawh kan bâng bik lo.

Mipui ngaihven bik thil a awm hian mi tam takin an website leh social media platform tihlârna remchang atan an hmang ṭhin. Mipui mitla deuh tur leh bengverh turte an zawn ṭhin avangin social media leh website hrang hrangah thu dik tâwk lo a darh nasa ṭhin a; tuna India leh Pakistan inepna boruakah pawh hian thu dik tawk lo a darh nasa tawha sawi a ni.

Mizo zingah Youtube channel siam tam tak an awm a, chung zinga eng emaw zat chuan India leh Pakistan inkar chhe mek hi an hriat ang leh thiam danin an puangzar a; hengah hian fimkhur a ṭha hle. Thu dik lo hmanga ṭul loa mipui tirálkheltu ni lo turin thu laknaah fimkhur a ṭul a, thu rintlak chauh tichhuak tura fimkhur ni se.

Mipui pawh kan fimkhur a ngai a, social media leh digital news hrang hranga kan hmuh leh hriat zawng zawng awih nghal zel loh a ṭha. Kan ngaihven zawng leh kan hriat châk zawng a nih pawhin chanchinbu leh TV-a Mizo ṭawng leh ṭawng dang chanchin tharte aṭangin hriat tum ila; social media-ah vêk pawh media rintlak ni sate thu lakna atan hmang ila a ṭha hle ang.

Thu dik leh dik lo tam tak a darh vel karah hian mipuite phílí chiam lo ila, chî-âi mai lo ila, sorkar lam thu ngaichâng zel ṭhin ila; sorkarin tih tur leh tih loh tur a tihte zawm mai hi a ṭha ber mai. Sorkar document-te siam danglama thu dik lo thehdarh awm thei lakah kan fimkhur a ṭul bawk.