Bru lâk lêt

Tripura refugee camp-a awm Bru-te Mizorama lak let dan tur ngaihtuah tura din, Joint Monitoring Group (JMG) chu tun hnai khan New Delhi-a Ministry of Home Affairs (MHA) conference hall-ah an ṭhukhawm. He hunah hian Tripura-a Bru camp chu kal reng thei a nih loh thu te, Mizoramah an lêt duh lo a nih pawhin ṭanpuina chu tihtawp a nih mai tur thute leh, Bru let duhte ṭanpuina tur sum tihchian thuai a ṭul thute sawi lan a ni.

Mizoram aṭanga anmahni duh thua Tripura-a tlan chhia Bru-te hruai kir tum hian sorkar laipui leh Mizoram sorkar hian ruahmanna a siam ngun tawh hle mai a, tun thlengin an lo la kir duh lo. An kir duh loh chhan hrang hrang a awm thei a, Mizorama kir an an hlauh vang lam aiin Tripura-a refugee anga awma a thlawna thil dawn an duh hi a chhan lian ber zinga mi niin a puh theih awm e.

Sorkar laipuiin ruahmanna a siam ṭhenkhat hi chu ram leilung fate tana thik tur khawpin a ṭha a, Mizorama an lo kir hnuah ṭanpuina thil leh sum chi hrang hrang dawn tur an nei dawn. Mizorama cheng Mizote tan pawha an pek ngai loh thil chi hrang hrang chu Bru lo kir duhte hnenah hian sorkar laipuiin pek a tiam a ni.

Heti taka ruahmanna ṭha leh felfai a awm tawh hnu pawha an lo la kir duh lo fo a nih chuan a chhan dik tak zawn chhuah a, tun aia na deuha umzui hi a ṭhat hmel. A hre chiangte sawi danin refugee camp-a an awm hian an hruaitu ṭhenkhatin nuam an ti a, hamṭhatna hrang hrang an dawnte chu a rei thei ang ber dawn zel an duh a, an chhuah loh dan ringawt an buaipui a nih hmel a, a ṭha lo hle a ni.

He refugee awm khawmna hmun aṭanga Mizoram inthlana vote an thlak ṭhin leh, kan politician-te'n lam ṭanga siam tuma an zuk kal chilha an phi ruai ṭhinte hi a huatthlala takzet a, hei hi tihtawp thuai a ṭul. Bru-te hi tun ṭumah hian an lo kir duh lo a nih chuan, tuna an awmna hmuna awm hlen theih dante a awm nge awm lo tia dan lam thiamte rawna chet a hun tawh takzet a ni.