Sorkar hnathawk inchuh

Hnahthial damdawi-ina medical officer chu Tlabungah sawn a ni a, he mi duh loh lantir nan Hnahthial khawtlang chuan khua an chhuahsan tur chu an dang a; sorkar thuneitute nen an inbiak rem hnuah an kaltir ta a ni.

Tun hnaiah sorkar hnathawk chhuak tur, an chhuah-san tur khaw mite'n an dan thu hi kan hre ta zauh zauh mai a, thil mak tak a nih rualin hetiang a thlen chhan hi hriat chian a ṭha hle. Sorkar hnathawk chu hmun khata awm reng tur an ni lo a, sawn chhuah theih an ni a; nimahsela tun hnaia sorkar hnathawk chhuak tur an inui riau ṭhin hi chu sorkar lam fel loh vang a ang hle.

Sorkar hnathawk ni si, sorkarin an duhna hmuna an tirh theih loh an awm. Heng zingah hian sikul zirtirtute leh damdawi-in lama hnathawkte hi an awm nual. Heng mite hi mipuiin an mamawhna a san avangin mipui pawhin an ui ṭhin a, an ui chhan chu a thlaktu an dah lawk loh ṭhin vang a ni.

Tun hnaia thil thleng ta fo, sorkar hnathawk chhuak tur indan hi a zialo khawp mai. Sorkar hnathawk chhuak tur lamin thiam lohna pakhatmah nei lo mah se, khaw mipuiin an dan luai luai ngaia an awm ṭhin chhan chu sorkarin a thlaktu a pek lawk loh ṭhin vang a ni. Post ṭhenkhat phei chu a luahtu sawn chhuah an nih hnuah hnawh khah loha dah hlen takte an awm a, hei hi a pawi hle a ni.

Sorkar hna kal-phungah chuan a hnathawktute hi hmun khata awm reng tur an ni lo a, sorkarin a mamawhna hmuna sawn kual theih an ni. Heng mite sawn an nih hian a hnawhkhat lehna tur lam hi sorkar ngaihtuah tur a ni a, a hnathawkte luh leh chhuah dan pawh rem fel hleithei lo sorkar kan nei fo mai hi chu a zahthlak ngawt mai.