All India/central service atana ṭan lak

9th May, 2025

MZP chuan May 7, 2025 khan HSLC 2025-a top 10-a tling Mizo zirlaite chawimawina hun an hmang a; khuallian Home Minister chuan, all India service leh central service-ah luh tum tur leh tling thei tura ṭan la turin zirlaite a chah. Mizorama district hrang hrangah Mizo ngei DC leh SP dah duh mah se, tunah chuan a theih loh thute a sawi a ni.

All India service an tih bikah, UPSC-in exam a buatsaihah Mizorama Mizote zingah tling an awm lohna a rei tawh fu a; IAS-a tling an awm hnuhnun ber chu 2014 a ni a, IPS-ah phei chuan 1995 a nia sawi a ni. A rei tawh vang vang hle.

Central service leh all India service hrang hrang zingah IAS leh IPS hi Mizorama kan hmuh tam berte an ni a, chuvangin all India/central service hrang hrang zingah IAS leh IPS hi Mizoram tan an pawimawh zual a tih theih.

IAS leh IPS-a direct-a lut thei kan awm lohna a rei tawh a; Home Minister-in Mizo zirlaite all India service leh central service-a luh tum tura a fuih hi a àwm em em a, Mizo ram leh hnam kal zelna atan thil pawimawh a ni.

All India/central service-a lut lo pawhin state service-ah hna ṭha tak thawkin sum tam tak a hlawh theih a; sorkar hna kher lo pawh sum lak luhna ṭha eizawnna hria kan tam ang. IAS/IPS leh central service danga luha hna thawh pawh eizawnna a ni a, mahse, chutah chuan a tawp mai lo a, tun dinhmunah ram leh hnam tan a pawimawh a ni. Hei hi Mizo zirlaite leh ṭhalaite'n kan hriat chian a ngai.

HSLC leh HSSLC-a thiam ber berte hi medical lama kal ṭhup ṭhup loin, all India/central service lamah luh ngei tum se ram tan thil ṭha tak a ni ang. Hun rei tak Mizoram aṭanga IAS leh IPS-a tling an awm tawh lo hi chonaah ngai thei se a duhawm.

All India service leh central service-a Mizo kan luh leh theih nan sorkarin nasa lehzualin ṭan la se, tuna hma a laknate hi a la tawk zo lo a nih a rinawm a, theihtawp chhuahin kawng ṭha zawk ngaihtuaha ṭan lak thar a ngai niin a lang.

Zirtirtute leh nu leh pate pawhin theihtawpin ṭan la bawk se, heti lamah hian rualawh tak tak nachang hria se, awmzia a nei ngei ang le.