Dan loa thil tite dap chhuah

Aizawl Two Wheeler Taxi Association chuan Aizawla two wheeler taxi khalh zingah hnam dang leh ram dang mi an awm leh awm loh an dap chhuah dawn thu an puang a, an hmalakna thlâwp turin sorkar thuneitute leh mipui an ngen.

Two wheeler taxi pawlte'n dan loa ram dang mi leh hnam dang zingah two wheeler taxi khalh an awm leh awm loh an endik tur hi thil ṭha tak a ni thei a, thil ṭha lo tak thleng palh thei a ni ve bawk. Thil ṭha lam a thlen beisei phawt mai ila.

Dan lekkawh tur hian sorkar mi leh sate an indaih tâwk lo niin a lang a, chumi vang chuan tun hma aṭang tawhin sorkar tih âwm tak hi pawlin an tih a ngai fo mai.

Mizorama dan loa awm te, hnam dang, inner line permit (ILP) nei lote leh ILP ang ni loa hna thawkte vaiin YMA leh zirlai pawlte'n an lo thawk chhuak tawh ṭhin a; dan loa Mizorama awm tam tak an lo man chhuak tawh. Ruihhlo dona leh thil dang dangah pawh sorkara a ti turte'n an hneh loh avangin pâwl hrang hrangin an thiam danin hma an la tawh ṭhin a, hma an la mek zel bawk.

Sorkar lam aṭanga mawhphurtute tan tih vek theih a nih miau loh avangin pawlin hma an lo lak ve hi a ngai ve ṭhin. Heng zawng zawngte hian thil ṭha tak tak a lo thlen tawh ṭhin a, chutih rualin, thil duhawm lo thleng pawh a lo awm zauh zauh tawh.

Pawlin dan loa thil tihte an dap chhuahnaah hian dan ngaih pawimawh a, dan ang taka thil tih a ṭha ber mai. Two wheeler taxi khalhtute'n dan loa two wheeler khalh an awm leh awm loh zawn chhuah an tumnaah pawh hian dan ngai pawimawh se, dan loa two wheeler taxi khalh hnam dang leh ram dang mi an hmu chhuak a nih pawhin dan anga bawhzui theitu thuneitute hnen thlen zel rawh se. Mahni kutzála dan lo lekkawh ve mai tur a ni lo.

Dan loa Mizorama awmte man chhuah te, dan loa thil tih ven leh dan loa thil tite man chhuah chungchangah sorkar hian ṭan a lak lehzual a ngai. Danin thuneihna a pek ni lote'n hma an lak ngai loin sorkar hian ti thei se duhthusam a nih rualin, duhthusam hi kan tlin lo a nih pawhin, pawl anga hma latute hi sorkara thuneitute lamin an ngaihven ve reng a ṭul.