Home/centre inrêlbâwlna leh enkawlna

Tun hnai lawk aṭang khan Aizawla home/centre pakhat, ruihhlo ngaite enkawlna hmuna inenkawl danin sawi a hlawh a, sawiselna a tam hle. Chumi hnuah chu hmuna awmte chu a duh apiang chhuah theih an ti a, mi tam tak an chhuak tawh nia sawi a ni.

Mizorama home/centre zinga eng emaw zat chu an tâwt em em a, an inekbeng tak meuh a ni. Dan angin an kal lo hlawm ni pawhin a lang a; dan anga kal pawh a harsa hle ang tih a hriat theih. Ei leh in, hriselna lam leh thil dang dangah harsatna a tam hle ang a, enkawlna ṭha inpek a harsa hle ang.

Ruihhlo ngai emaw, nau nuchham emaw enkawlna hmun din leh enkawl chungchangah hian dan a awm a, dan ang taka an kal a ṭha berin a rinawm. Chutih rualin, dan ang taka kal te, a ṭha thei ang ber inenkawlte an duh ve thoin a rinawm a, mahse, an dinhmunin a zir lo a ni thei.

Kan ramah ruihhlo a hluarzia te, ruihhlo ti an tamziate kan hria. Thuneitute leh YMA lamin ruihhlo tite an khâwm a, tam tak chu home/centre-ah an nawr lut pawp pawp mai ṭhin. Hetiang hi ruihhlo tite leh kan ram leh hnam tan thil ṭha ber a ni em tih leh, tih dan ṭha zawk dang a awm thei em tih ngaihtuah nawn a ṭha âwm e.

Centre/home zinga tam tak hi dan ang takin an kal thei lo tih hriat sa a ni. Dan ang taka an kal theih nan leh, ṭha zawka an inenkawl theih nan sorkara thuneitute hian an ngaihven a ṭul a; kohhran leh pawlte bakah, mipui nâwlpui pawhin kan ngaihtuahpui a ngai ta tak zet niin a lang.

Home/centre-te dan ang taka an kal theih nan leh inenkawlna pawh a mumala a ṭhat zawk theih nan admission fee leh monthly fee-te pawh lak a hun tawh em? Chung aṭanga sum lut hmang chuan ei leh in leh inenkawlna tun ai chuan a ṭha zawk hle thei ang.

Naupang/ṭhalai fel leh enkawl nuam tak tak, hostel-a awmte tan enkawltute hnenah cheng sang tél kan séng ngam ṭhin. Ruihhlo ngai, home/centre-a dah lut turte pawhin kan enkawl hleih theih tawh loh, enkawl harsa tak takte min enkawlsak turin kan dah a ni tih hria ila, enkawltute hnenah sum sên kan inhuam ve a hun ta.

Tunlaia centre pakhat boruak hi sorkar hian harh tharna atan hmang se; inrêlbâwlna leh inenkawlna chungchangah home/centre-te hi tun ai hian ngaihsak se, dan anga an kal theih nan chak lehzualin hma la rawh se.

Ruihhlo ngaite enkawlnaah mimal home/centre ringawtah innghat loin, sorkar hi dan ang taka kalpui tur leh mithiamte'n an enkawl tur home/centre din turin hma a lak tak tak a hun. Sorkar hi ruihhlo 'demand reduction' lamah na zawka a kal a hun ta e.