AR hmuna ram neitutea hmalakna

Aizawl khawpui lailia Assam Rifles hmuna ram nei zinga mi pakhat chuan tun hnai khan sorkarah a pe kîr a; chutih laiin, AR hmuna ram nei, sorkara la pe kîr lote'n an pe kîr ve theih nan hma latu tur leh ngentu tur committee sorkarin a din.

Land Revenue & Settlement Minister chuan AR hmuna ram neite'n sorkara an pek theihna tura ngentu tur committee-ah sorkar official-te bakah sorkar mi leh sa ni lote an tel thu leh, committee chu ama'n a kaihruai dawn thu a sawi.

Thuneitute sawi danin, AR hmunah hian mi 54-in ram an neia hriat a ni a, an vaiin sorkarin insawifiah tura hriattirna a pe tawh. Mi 54 zinga mi 51-in show cause notice an chháng a, mi pathumin an chháng lo. Ram nei zinga mi 14-in an ram sorkarah an pe lêt tawh a, mi 11 erawh chuan court-ah sorkar an khing thung.

Assam Rifles-in Aizawl khawpui lailia an hmun an chhuahsan tâkah chuan sorkar, pawlte leh mipui tam takin AR hmun chhuahsan hman zui dan tur an ngaihven em em a; sorkar pawhin mipui nawlpui lungawi tlan theihna turin fimkhur taka hma a lak a ṭha.

AR hmuna ram neite'n sorkara an pek lêt theihna tura sorkar leh pawlte'n hma an la hi a lawmawm a, tun thlenga ram la pe lêt lote pawhin an pek lêt theihna tura ngentu tur committee hial din a ni pawh a lawmawm. Committee hian theihtawp chhuahin bawhzui se.

Ram neitute hian dan lo leh dik lo taka thil ti chunga ram nei mai an ni bik lo mai thei a, ram an neih danah dan ang taka thil tih a nia an hriat avangin ṭhenkhat chu dan anga rorelna court-ah an kal ngam hial niin a lang.

AR hmuna ram neitute'n sorkara pe lêtna tura hmalaknaah hian invau zawnga hmalak a ṭha lo thei a, innawr leh lutuk pawh a fuh lo thei. Invau zawng ni loin, zâwldawh tak leh ram neitute thinlung hmin thei tur zawnga hmalak a ṭhain a rinawm.

AR hmuna ram neitute pawhin pe lêt vek thei se duhthusam a ni a, chutih rualin, harsatna lian tak an lo nei ve reng thei bawk. Ram an pek lêt theih nan ruahmanna ṭha tak sorkarin a siamte pawh a la ṭul thei a; inhawng taka hmalak a ṭul ang.