Fimkhur leh insum hun a ni

Krismas kan hmang liam ta a, kum dang chu ni se Kumthar läwm turin Mizoram mai ni loin khawvel mipuite an inbuatsaih ang. Kumin erawh Covid-19 avangin khawvel hmun hrang hrangah Kumthar läwm dan a dang deuh dâwn a; Mizoramah pawh sorkarin Covid-19 a darh zel lohna turin pun khawm a khap a, kohhran inkhawm pawh kalpui theih a ni lo a, ruaiṭheh pawh a awm lo ang. 

Hetihlai hian hun âwl remchangah ngaiin chhungkaw tam takin châw ei khawmna hun an buatsaih a, thianho leh pawl ṭhenkhat an inhmu khawmin châw an ei khawm bawk a, inhmu khawm tawh leh inhmuh khawm tuma duang sâ eng emaw zat an awm. 

Health Minister-in Mizoram mipuite he hunpuiah hian insum tlâng tura ngenna a siam kha hre reng ila, hlawm lian tham ni loa innel sâ punkhawm (small gathering) hi khawvel hmun dangah pawh Covid-19 hri ṭai darhna nasa tak a lo ni tawh a, hei hi kan ramah pawh a thleng ang tih hlauhawm tak a ni. 

Hei vang hian Krismas leh Kumthar inkar hun awl remchang hi fimkhur zual a hunah hmang ila, punkhawmna leh châw ei khawmna tura duan sâ kan neihte pawh a theih chin chinah insum tlâng ila, Covid-19 avanga kan buaina belhchhah a nih lohna turin he hun hi fimkhur takin i hmang ang u khai.