Halpuah khap

Krismas leh Kumthar vuak-vetah Mizoram sorkar chuan halpuah hal leh zawrh a khap leh dawn niin a lang. Mizoramah hian hlawhtling taka halpuah khap a nih hnuah sorkar ruahmanna angin a hal hun siam a ni a, tun hnaiah an khap thar leh ta a ni.

Mizoram sorkarin halpuah a khap a, tlawmngai pawl lamin theihtawp chhuahin an bawhzui a, media lamin mahni insengsoin halpuah hal lo tura inzirtirna an pe chhuak reng bawk a, thawkkhat lai khan Mizoramah krismas leh Kumthar vuakvetah halpuah ri hriat tur a awm mang lo. Khawpui ber Aizawl pawh a rehin a thiang a, mipui mimir bakah nunau leh damlo tan a nuam em em a, kum hnih kum thum chu halpuah ri hre mang loin hunpui kan hmang.

A khaptu sorkar berin eng an hria ni maw halpuah leh halmawi hal dan tur ruahmanna a rawn nei zauh a, hei hian mipui a fuihpawrh a, halpuah ri tel loa hunpui hmang thiam tawhte chu halpuah hal a rawn zirtir thar leh a ni ber mai.

Halpuah leh halmawi kan ban phaka awmte hi ram danga mite nen khaikhin chi a ni lo a, ram danga hunpui lawma an hal ṭhinte hi chu mihring hriselna atana pawi lo thei ang bera duan a ni a, awmze nei taka hal a ni ṭhin bawk. Kan rama kan hmuh phakte hi chu hriselna atan a ṭha lo a, miin a duhna hmun apianga a duh hun huna a hal ṭhin avangin mipui vantlang tan a hnawksak a, a bikin nunau leh damlo tan harsatna lian tak an thlen.

Mizoram sorkar hian halpuah hi a khap leh dawn a nih chuan tun hi a inpuahchah hun a ni a, phai aṭanga lo lut tur aṭanga an ven ṭan a ṭh ang. Krismas leh Kumthar hi halpuah tel loa hman kan thiam tawh a, kan chin ṭhin ṭha loah i kir tawh lo ang u.