Eirawngbawlna gas harsatna

Tun hnaiah Mizoramah eirawng--bawlna gas a harsa hle a, chhung-kaw tam takin harsatna an tawk mek a ni.

Mizorama eirawngbawlna gas a harsat thut chhan chu thil dik lo lian tak hun rei tak lo kalpui tawh tihtawp a nih tak vang a ni a, thil tihdik duhna avangin a ram pumin kan tuar mek. Central YMA hmalaknain Mizoram chhunga eirawng-bawlna gas an khawih chingpenna hmun an luh chhuah a, thil kalpui dan dik lo tam tak hmuh chhuah a ni. Hemi nghawng zelah hian eirawngbawlna gas tihchingpen ṭhina a hlawkna têltute'n harsatna an siam a, ram pumin kan tuar tlang ta a ni.

He thil hi mi ṭhen-khat chuan contractor-te sual vang leh eirawngbawlna gas kal dan mumal loh rei tawh vang a nih thu an sawi a, a dikna chen awm mah se Mizoram sorkar inthlahdah rei vang a ni ber. Tun hma deuh aṭanga eirawngbawlna gas kal danah hian thil fuh lo tam tak a awm a, state dangte tih ve ngai loh thil tam tak kan ti a, a gas dawng ṭha ber state kan ni chuang lo a, tunah phei chuan kan buai ta hle a ni.

Kan sorkar hotu lam pawhin tun hma aṭang tawhin eirawngbawlna gas sawi chhuak thei nih chu kan inchhuan phah emaw tih mai turin kan kalna chin media-ah kan tarlang zel a, gas pe chhuaktu lama officer lian ber ni lo thlengin kan minister-te'n an kal chilh zel. Hei hian eirawngbawlna gas hnianghnar takin dan angin min pek belh phah a nih chuan a ṭhain a ṭangkai a; nimahsela kan dinhmun dik tak kan hre chiang a, kan hotute'n tun hma aṭanga gas an lo sawi chhuah dante kha dan hrul hreta tih a ang ta lek lek a, kan kawt kaia gas kan duh leh duh loh min zawh ṭhinlaite kha ngaih-awm viau mah se dan loa thil kan kalpui thui vang a ang ta hle.

Tuna eirawngbawlna gas harsatna awm mek hi Mizoramah dan ang taka mumal zawka eirawngbawlna gas lakluhna kawng hawngtu ni se, tute emaw intivei leh suahsul vanga a state pum kan buai tawh lohna turin sorkar hi sorkar ni ngam se, a thlenna tur dikah thlenin eirawngbawlna gas hnianghnara kan hmuh theihna turin ṭan la rawh se.