Thil tawlhrukna kawngpui?

Champhai police-te chuan tun hnai khan Myanmar aṭanga lak luh nia hriat, rangkachak tlang 150, cheng nuai 450 chuang hû an man a, a neitu nia hriat an man bawk.

Tun hnaiah Mizoram chhunga rangkachak tawlhruk hriat tur a awm ta zauh zauh a, tlemlai deuh khan Assam Rifles officer pakhat chu he thilah hian man a ni a, a chungchang hi CBI kutah dah a ni. Kha thil thleng kha tun thleng hian mipui chuan a chin kan hre zui lo a, a inhnamhnawiha puhte pawh bail-a chhuahtir an ni a, dan loa a rangkachak phurtu nia inchhalte thlengin tunah hian umzui lohin an awm niin a lang.

Thil hlauhawm tak chu Mizoram hi dan loa thil tawlh rukna (smuggling) kawngpuiah a chang palh ang tih hi a ni a, chutiang chuan an lo hmu tawh reng pawh a ni thei. Zêp thu a awm lo a, Champhai aṭanga Aizawl panna kawnga khualzin phur lirthei an dap dante leh check gate-a kan duty-te khawsa zia en hian, thil man chhuah loh tam tak hi chu a awm ngei dawn tih a chiang a ni.

Rinhlelhna tizual turin Zokhawthar leh Aizawl inkarah zan lamah maxi cab a tlan tam hle a, khaw dang leh hmun dangah zan lam service a tlem tehlul nen, he kawngpui bika zan tlan an tam lutuk hi chuan ngaih a tiṭha lo. Central YMA lam hruaitu, ruihhlo dona kawnga ke pen ṭhinte'n vantlang hriatah heng maxi cab zingah hian ruihhlo phur ṭhin an awm thluah mai, tihte an sawi ri ngam hial a nih kha.

Thil hlauhawm tak mai chu Mizoram hi a ralmuang kan tihlai hian dan loa thil tawlh rukna hmunpui a lo ni palh reng thei a; a khat tawka silai, rangkachak, lunghlu, ruihhlo leh sorkar phal loh chi man thawm hriat tur awm reng maite hi a zialo hle a ni.

Hemi kawngah hian state police-in ṭan an lak a ngai a, helaia duty tura dah sipai lam pawh an fimkhur sawt a ṭha a, Customs lam pawh tun aia taima leh titak zawka hna an thawh a ṭul a; Mizoram hi dan loa thil tawlhna hmunpui a nih lohna turin mipuite pawh kan ṭan tlan a ngai takzet a ni.