Sorkar doctor

MZP headquarters, Lunglei hruaitute chuan Health minister hmuin Lunglei Civil Hospital-a thawk doctor sawn chhuah tum chungchang an sawipui a; Lunglei MZP thu thlenah hian Health Minister chuan ram pum huapa doctor indaih lohna a nasat thu a lo hrilh a, a theih ang anga hmalak a nih tur thu a sawi.

Tunlaia Mizorama harsatna awm pakhat chu sorkar doc-tor indaih loh chungchang hi a ni. Khaw ṭhenkhat aṭanga an insawn chhuah hnuah an chhuah-sante'n doctor thar an neih mai loh avangin harsatna an tawk ṭhin a, hei hi khaw tam tak buaina tawh mek a ni.

Sorkar lamin an harsatna an sawifiah ber chu sorkar doctor indaih loh hi a ni a, hei hi chu mipui pawhin an hrethiam thui hle. Chutih rualin Health department inrelbawl dan hi tun anga kal reng lo hian siksawi kual ni ta se, tun aia ṭangkai zawk hian kan doctor-te hi hman theih dan a awmin a rinawm.

Tunah chuan Health depart-ment hi hmun hnihah ṭhen an ni a, a peng hrangte nen phei chuan department lian ber pawl an ni. Hengahte hian a hotu lu lamah medical doctor an ni deuh vek a, a ṭulna chen awm bawk mah se post ṭhenkhat hi chu MCS lamin emaw, administration khawih ṭhang staff dang kutah emaw dah thiam ni se a ṭha zawk mai thei.

An zirlai aṭanga damlo enkawl tura zirtir, chumi hnua a ṭhente phei chu specialist kan tih mai ni tura inzir chhunzawm zelte an ni hlawm a; nimahsela tawnhriat (experience) an nei ṭha ta maw tihah an kaisan a hun a, sorkar office lama ṭhu tura seng luh an ni leh mai ṭhin.

Office-a ṭhu tur hian doctor-te an pawimawhna hi chu a awm ngei a; amaherawhchu an kalphung hi management leh administration lama mi thiamte'n zir chiang se, sorkar doctor office-a ṭhu tam ta lutuk hi siam rem theih a nih hmel a, sorkar doctor indaih lohna phuhruk tur hian inlak belh kher loin inrelbawlna sawi danglam hian tih theih tam tak chu a awm ngei ang.