Zirlaite tana remchang siam

YMA, Ramthar Veng Branch, Aizawl chuan an venga zirlaite tan tun hnaiah Aptitude Challenge Examination an buatsaih a; aptitude, reasoning, general knowledge leh english-ahte exam buatsaihin, an venga zirlai 312 an tel. Zirlai ti ṭhate hnenah lawmman ṭha tak an pe a, lawmman tur chu an veng mite'n an thawh khawm a ni.

Ramthar Veng YMA-in Aptitude Challenge Examination an buatsaih hi zirlaite'n zirna sang an hmachhawn thiam theih nan te, hna zawnnaa hma an sawn theih nan leh hmangchang an hriat theihna atante a ni. An venga zirlaite hmakhua atana ṭhahnemngai tak leh insengsoa hma an an la hi a lawmawm a; zirlaite pawhin an ṭangkaipui ngei a rinawm.

YMA branch-te hian a tlangpui thuin zirna lamah rual an awt tlang a, an khua/venga zirlaite tana ṭhahnemngai taka hma la ṭhin tam tak an awm. Ṭhahnemngai zingah ṭhahnemngai lehzual an awm bawk. An huam chhunga zirlaite hmasawnna tura theihtawpa hma la a, zirlaite hmasawn theihna tur remchang an buatsaih ṭhin hi a lawmawm a ni.

Khaw tin leh veng tinah hian khawsak nuamsa tak tak an awm laiin, khawsak harsa tak tak tam tak an awm. Khawsak harsa deuh hlek aṭanga chawr chhuakte'n zirna lamah rualawt viau mah se, neihin a phâk loh chin a awm ṭhin. Chung mite'n hma an sawn ve theihna tura remchang siam ṭhin hi a ṭha tak zet.

Zirlai zingah zirna sang zawk leh ṭha zawk thleng tura inbuatsaih hlei thei lo, tihngaih hre lo, kawnghmang hre lo tam tak an awm; chung mite tan chuan remchang siamsak theih ni ṭhin se a duhawm. Hetiang lamah hian YMA branch hrang hrangte'n ṭan la lehzual se, mimal bakah ram leh hnam tan a ṭha hle ang.

Mizoramah industry lian a awm lo a, agriculture leh a kaihhnawih aṭanga deuh chhuah a tam tawk lo bawk. Heng aṭang hi chuan state economy ṭhantir tak tak tura hmalak a harsa rih.

Thiamna nei mihring chhawr tlak (human resource) neih ṭhat hi kan state economy tihṭhatna atana pawimawh ber pakhat a ni. Zirna leh thiamna lama hmasawn te, hna thawk tlaka mi chher chhuahte hi ram leh hnam tan a pawimawh em em. Sorkar mai bakah, kohhran, YMA leh pawl dangte pawhin tun aia nasain ṭan an lak lehzual a ngai a ni.