Sorkar leh AMC

UDPA minister chuan tun hnai khan Aizawl Municipal Corporation (AMC)-a councillor-te a kâwm a, Aizawl khawpui tihhmasawnna tur scheme, Atal Mission for Rejuvation and Urban Transformation (AMRUT) hnuaia hmalak dan tur an sawiho. Minister chuan, AMC councillor-te nen thawhhona ṭha tak an neih chu chhunzawm zel a duh thu a sawi.

Mizoram sorkar kaihruaitu political party chu Congress an ni a, AMC kai-hruaitu political party chu MNF an ni. Heng party pahnihte hi party inel tak, thawk dun hleithei lo, lian zawk leh lal zawk nih tuma inchuh reng reng an ni. Hetihlai hian AMC kal danah hi chuan Mizoram sorkar leh AMC hi
ṭha taka an thawhho a ngai si a, an thawhhona a ṭhat loh chuan khawpuiin a tuar dawn a ni.

Sorkar lam chuan AMC nen an thawhho ṭhat thu an sawi a, hei hi chu vawi tam tak an sawi tawh. AMC lam pawh hian vantlang hriatah sorkar demna lam emaw, a sawiselna lam rawngkai hi an sawi chhuak tam lo a, an thawhhona hi a ṭha thawkhat niin a lang.

Hetihlai hian political ideo-logy inang lo ta na na na chu khawi emaw laiah hian inpawt a awm lo thei lo a, hnathawh duh danah a inang lo ang a, hnathawktu tur thlan danah phei chuan ngaihdan a inang lo zual ang.

Engpawhnise sorkar lam leh AMC hian an din chhan mipui hi dah pawimawh ber ṭhin se, hnathawh duh dan a inang chiah lo a nih pawhin mipuiin an tuar lo ang. Chuti ni loa hmasawnna hna thawk hleithei loa a ruka inpawt a awm a, pawisa tam tham inhlan chhawn dawn apianga harsatna a awm a, hna lian tham thawh dawna thil inchuh a awm fo chuan a tawpah hmasawnna hnathawhin a tuar a, chu chu mipuiin an tuar ṭhin a ni.

Mizoram sorkar leh AMC hian pawnlanga an thawhhona ṭhatzia an sawi lan hi a takin lantir se, chu chu mipuiin an chhawr dawn a, hmasawnnain a umzui thei ang.