Sorkar a inthlahdah rei

Tun hnaiah Mizoramah kawng chhia leh eirawngbawlna gas vang avangin mipuiin harsatna an tawk mek a, sorkar pawhin mipui harsatna sut kian tumin rua-hmanna hrang hrang a nei mek.

Kawngpui hi chu furah a chhe ṭhin a, thil thar a ni lo. Kuminah hian fur a rei a, ruahtui a tla hma bawk si a, tui hul tak tak awm loin October thla laihawl kan thleng a, hei hi kawngpui chhiat chhan a ni. Nimahsela sorkar hian kawngpui pawimawh zual bikte hi a chhiat lutuk hmaa thawm nachang hre ṭhin se, a khuar zualpui leh tlan harsa khawpa a awm hma hian hnawh phui
ṭhin se, mipuiin kawng ṭha tak an beisei bik lo a, lirthei tana tlan harsa lo tawk hi kawngpui pawimawh bikah hi chuan an phût a, chutiang pe thei lo sorkar chu an dem lo thei lo.

Eirawngbawlna gas-a harsatna pawh hi thil thlir lawk thiam harsa tak a ni a, thil dan theih loh erawh a ni lo. Gas tihchingpen a nih dante leh an kalpui dan hi chu a viltu departmernt hian an hre chiang hle ang a, a dan theih dan tur leh harsatna chinfel dan tur hi sorkar thuneitute an hriattir tur a ni. Tunah pawh tlawmngai pawl lamte che chhuak lo se Mizorama gas-te hi tihchingpen a la ni reng dawn a, kalphung dik lo zawka kha leh chen kan kal kha chu a viltu lam thiam loh a ni thui hle.

Heng thilte hi sorkar tana inven theih loh tawp a ni lo a, ruahmanna fel zawk chu awm se he harsatna thleng hi thui tak chu pumpelh theih a nih hmel. Sorkar hian a buaina tur hi a thlir phak lo a ni mai thei a, hetiang hunah hian officer bengvar deuhte emaw hian thuneitu lian hi thil chinchang hriattir ṭhin se a ṭangkai thei awm e.