Mithiam enfiahna tihpuitlin a ngai

Sorkarin a chah chhuah Council of Scientific & Industrial Research - Central Institute of Mining & Fuel Research-a Chief Scientist leh Maccaferri Geo-Technical Solutions-a Senior Manager te leh anmahni ṭawiawmtu Mizorama mithiamte chuan May 12, 2025-ah Lengpui Pukpui khâm an enfiah a, May 13-ah Ngaizel khâm leh Hlimen khâm an enfiah leh bawk.

Mithiamte hian Chief Minister, Disaster Management & Rehabilition Minister leh hotu dangte hnenah an thil hmuh dante an thlen tawh. Mithiamte'n mipui tana hlauhawm em em khâmte enfiahtir a ni hi a lawmawm a, rah ṭha a chhuah ngei a beiseiawm.

Mithiamte hmuh danin, Ngaizel khâmte chu râwt zâwl deuh te, tui pût awm nasa vên te, thîrlên rintlak hmanga tuam hnua concrete-a khuh te, chhak lam aṭanga bawlhlawh leh tuichhe paihna mumal zawk siam te, lung kara thing zung lut tam tak suatte a ṭulah an ngai a; Lengpui Pukpui khâma tohlâwt hâl darh an rawt nia sawi a ni.

Mithiamte'n ṭha tur nia an hriat an sawite hi eng ang taka ṭha leh rintlak tur nge tih mipui tam ber tan hriat phâk a ni lo. Mithiam bik an nih avangin kan rin ngam tur a ni a, sorkara thuneitute pawhin an pawm mai a ṭul.

Mithiamte enfiahtir ringawt hi chu chhiatna pumpelhna emaw, tihtlemna leh tihnêpna a la tling lo. Enfiahtir hi sorkar hian a duhtâwk mai tur a ni lo a, ṭha tura an ngaih leh an rawtnate tihpuitlin a ngai a; tipuitling turin theihtawp chhuaha bawhzui a ngai.

Aizawl khawpui huam chung hmun dangah leh Mizoram hmun dangahte pawh khâm hlauhawm bik, chhiatna leh thihna hial thlen tawhna eng emaw zat a la awm. Khâm hlauhawm dang pawh hi sorkar hian mithiam zawkte enfiahtir leh thei se a duhawm hle; mipui pawhin an beisei hle ngei ang.

Khualrel chhiatna, leilunga chhiatnate hi hriat lâwk theih a ni lo a, chhiatna tâwk lo tura mi tin kan fimkhur a ṭul. Fûrpui a thleng dawn hnai a, sorkar leh mipui hi chhiatna laka invênna kan ngaih pawimawh a ṭul a; chhiatna a thlen pawha tawrhna rapthlak a thlen lohna tura kan inbuatsaih ṭhat a ṭul tak zet a ni.