Inrenchem

Central YMA chuan a vawi khatna atan Rorel Inkhawm chu tun hnai khan an buatsaih a, General Conference hmanga mi ṭhahnem tak pun khawm ang ni loin rorel tur palai chauh an kal khawm a, tluang takin rorel an nei thei.

Kohhran ṭhalai pawlte pawhin kum tin maia a huhoa inhmuh khawm an kalpui ta lo a, kohhrana hmeichhe lamte pawhin hei hi an kalpui dan a ni. Kohhran lam hi chu thu dang a ni a, tuna YMA-in kum tina General Conference neih kher ngai loa Rorel Inkhawm an kalpui ta hi a finthlak a, a zangkhaiin hun, tha leh sum a heh lo a, rawtna fing tak niin a lang.

Kohhran pawh ni se, YMA pawh ni se, inkhawmpui lian tham a thlen dawnin amahin a ti thei lo. Kohhrante hi chu sum lamah chuan a pachhe hran lo chungin ṭhalai inkhawmpui lian a thlen dawn chuan sorkar bawk a pur leh a, sorkar aṭanga ṭanpuina awm thei ang zawng zawng hi an ngaihtuah a, a tawpah chuan sorkar tan pawh phurrit a tling. YMA General Conference-te lek phei chu sorkar tel loin an kal thei lo a ni ber a, sorkar ṭanpuina hi an innghahna ber a ni ṭhin.

Kohhran a ni emaw, NGO an ni emaw anmahni suma inkhawmpui leh puipun lian tham an buatsaih thei a nih chuan a ṭha mai a, chuti ni loa sorkar pûr leh tur chi hi chuan inkhawmpui hi tun aia khat deuh zawka neih zel hi a ṭha. Tunah chuan inkhawmpui nei tura a huhoa kum tin mai punkhawm hi kan zo ta meuh lo tih kan pawm tawh a, a hahthlak piah lamah a hautak a, hahdam leh zangkhai zawka thil kalpui kan thiam ta hi a zawngchhangthlak hle a ni.