Sawhthing leiah chak zawka chêt a ṭul

Sawhthing, hmarcha, hmunphiah leh aieng hralh leh lei buaipuitu Mizoram Agriculture Marketing Board chu May 13, 2025 khan Chief Minister hoin an ṭhukhawm a; thlai chi li leina atan sorkarin MAMB hnenah cheng vbc. 62.599 a pe tawh a, sawhthing quintal 1,13,627 lei a ni tawh tih tarlan a ni.

Sorkarin MAMB hnena vbc. 62.599 a pek tawh aṭangin MAMB-in District Agriculture Marketing Committee-te hnenah vbc. 58.08 a pe chhâwng tawh a, sorkarah cheng vbc. 20 a dil belh mek tih tarlan a ni bawk.

January 23, 2025-a Aijal Club-a Mizorama thlai ṭhenkhat ram pawna thawn chhuah dan tur sawihonaa Horticulture dept. hotute tarlan danin, kumin (nikuma chîn)-a Mizorama sawhthing thar beisei zat chu qtl nuai 14.87 a ni. May 13, 2025-a sawhthing lei tawh zat tarlan chu qtl 1,13,627 chauh a la ni thung.

Horticulture dept.-in sawhthing thar beisei zat an chhût hi a takah tling lo deuh pawh ni se, lei tawh zat hi thar beisei zat aṭangin 10% pawh a la tling lo tihna a ni a; sorkar hian a la lei tlem hle tihna ni.

Agriculture Minister-in January 7, 2025-a press conference a neihah, sawhthing leina atan kum 2024-25 budget-ah sorkarin cheng vbc. 110 a dah tih a sawi.

Thlai chi li leina atan vbc. 62.599 pek chhuah a ni tawh a, sawhthing leina bik atana sum hman phei chu hei ai hian a tlem zawk ngei ang. Sawhthing leina atan sum la pek chhuah loh tam tak a la awm tihnaah a ngaih theih.

May 13, 2025-a MAMB ṭhutkhawma tarlan aṭang hian Mizoram sorkar hian sawhthing a la lei tlem hle tih a hriat theih a, sum pawh pek chhuah loh a la tam tih a lang. Hetih lai hian, Mizoram hmun hrang hrangah sawhthing la hralh ve theih loh vanga mangang, hrehawm ti taka awm mek tam tak an awm niin a hriat.

Sorkarna chelh mektute hi sawhthing kg. khat Rs 50 zela lei tiamtu an ni a, hei hi an sorkar theih chhan lian ber pakhata mi tam takin an ngaih a ni. An intiam ang taka sawhthing lei zawh vek hi an bat a ni.

Kum dang angah chuan sawhthing hralh tur ang ang hralh zawh duak a hun tawh laiin, sawhthing tam zawk hralh/lei a la nih loh bawk si avangin sorkar hi chak lehzuala a chêt a ṭul. Sawhthing lei vek tur thu sawi ringawt hi a tâwk lo a, a tak taka lei vek a ngai a, sorkar hian chak lehzualin hma la ngei teh se.