Fûr atan inbuatsaih lâwk zel ila

Food, Civil Supplies & Consumer Affairs department hotute chuan kumin 2025 fûr thleng tur atan buhfai an chhêk khâwl ṭha a, fûr laiin buhfaiah thlaphânna tur a awm loh thu an sawi.

FCSCA hotute sawi danin, moonsoon stock an neihna ṭhin kudamahte buhfai chhêk khawl zat tura ruahman an chhêk deuh vek tawh a; ruahman zat ang la chhêk khawl lohnaah pawh chhêk belh zel a ni dawn.

Buhfaite chu thla hnih aṭanga thla riat chhung daih tura chhêk a ni. Fûr atana buhfai chhêk khawl ngai zat tura chhût chu quintal 1,43,413 niin, May 9, 2025 thlengin Mizorama hmun 60-ah qtl 1,37,570.52 chhêk a ni tawh a, qtl 5,824.48 chhêk la ngai tura chhût a ni.

Mizoram hi tlang ram a nih avangin fûr laiin hmun hrang hrangah leimin vangin kawngpui a ping fo a, ni tin mamawh phurh a khaihlak cháng a awm ṭhin. Hmun kilkhâwr zualah chuan kawng ṭha lo hrim hrim vangin fûr chhung zawng lirtheia kalpawh theih loh a awm ṭhin bawk.

Hengte avang hian fûr chhung daih tur buhfai chhêk khawl a pawimawh tak zet a, tun hma aṭanga tun thlenga sorkarin a tih ṭhin a ni. Chutih rualin, buhfai chhêk khawl tam loh kum, inchhêk ngah hman loh kumte erawh a awm ve bawk a; chuti chungin buhfai chhêk khawl tam loh vanga buhfai ei tur neih loa chhuanchham ta erawh sawi tur a awm meuh lo niin a lang.

Fûrpui kan thleng ṭêp tawh a, chumi atana inpuahchah lâwka Mizoram hmun tam zawkah buhfai chhêk khawl zawh thawkhat a ni tawh hi a lawmawm a; hma latu leh thawktute an fakawm. Tuna buhfai la chhêk ngah lohna hmunahte pawh fûrpui hma ngeia chhêk ngah hman ngei turin ṭan han la sauh sauh teh se.

Mizoram hi ruahtui tamna, fûr laia chhiatna leh harsatna eng eng emaw thlen ṭhinna hmun a nih avangin, buhfaiah chauh lo pawh thil hrang hrangah fûr laia harsatna lian a thlen loh nan tun aṭangin ngawrh taka inbuatsaih a ṭul.

Fûr atana inbuatsaih tur hian sorkarin mawhphurhna sang tak leh tih tur tam tak a nei a; pawl hrang hrang, khawtlang leh chhungkuate pawhin mawhphurhna leh tih theih kan nei ṭheuh bawk. Ka mawhphurhna ṭheuhte hriain tun aṭangin i inbuatsaih lâwk ṭheuh ang u.