Râltlânte khuahkhirh leh enkawl

Chanchinbumite intêl khawmna MJA chuan May 16, 2025 khan Aizawl Press Club-ah General Body Meeting neiin, tunlaia mipui ngaihven leh sawi hlawh ráltlân, ramri hung leh ruihhlo chungchang an sawiho.

Ram leh hnam ṭhatna duha tunlaia Mizoram mipui ngaihven thil pawimawh tak tak chanchinbumite'n an sawiho hi a ṭha hle mai a, an ṭhahnemngaihna a lawmawm. An thil sawihoin a kaihhnawih theih sorkar, kohhran leh pawlte kai harhtu ni se a duhawm.

Sawihonaah hian journalist-te chuan, raltlante chungchanga rilru puthmang tur nia an hriatte an sawi a; raltlante mumal taka chhinchhiah a, khuahkhirhna leh kaihhruaina ṭha zawk nen enkawl ṭul an tih thu an sawi.

Police record-a a lan danin, September 2023 aṭanga December 2024 inkara ruihhlo kaihhnawiha Police-in an man zinga 92% chu Mizoram mi an ni a, Myanmar mi 4% chiah an awm a, 4% dang chu Mizoram pawn lama India mi an ni. Record aṭang hian ruihhlo kaihhnawiha man zingah Myanmar lam mi aiin Mizoram/India mi nasa takin an tam zawk tih a hriat theih.

Mizoram mi tam tak chuan Myanmar lam aṭanga raltlan rawn lutte avangin Mizoramah ruihhlo tawlhrûk leh pawi khawihna dang a tam phah niin an ngai niin a lang a; a dikna chin a awm. Pawi khawihtu zinga tam ber chu Mizoram mi an ni a, Myanmar lam mite'n pawi khawihna a titam zual a ni.

Hetih lai hian, Myanmar lam aṭanga rawn lutte ngaihtheih lohna leh hnawk tihna avangin mi ṭhenkhat chuan pawi khawihna ṭhenkhatah Myanmar lam aṭanga rawn lutte inhnamhnawih angin an puh lui niin a lang. Myanmar lam mite inhnamhnawihna ni hauh si lo, an inhnamhnawih anga puhna a awm zauh zauh tawh. Thu dik lo leh dâwt hmanga inpuh hi thil ṭha lo tak a ni a, Mizoram mipui kan fimkhur a ngai.

Mizoram mipui zingah Myanmar aṭanga sahimna zawnga rawn lut Zo hnahthlakte hnawk tihna a lian tawh tih a chiang a, hei hi sorkarin a ngaihthah loh a ṭha. Chanchinbumite'n ráltlante mumal taka chhinchhiah a, khuahkhirhna leh kaihhruaina ṭha zawk nen enkawl ṭul an tih thu an sawi hi sorkar hian bawhzui se a ṭha hle ang.

Sorkar hian raltlante mumal taka a chhinchhiah a, a khuahkhirha a enkawl loh chuan thil pawi zawk a thleng palh thei a; chutiang thleng lo tur chuan sorkarin hma a lak ran a ngai e.