A ṭha leh tling apiang lâk

Mizoram sorkar chuan police constable a ngheta thawk tur eng emaw zat lakna a kalpui mek a, personal interview chiah hmabak a ni tawh. Police constable lak turah hian dik leh fel taka thil tih a nih thu leh, a ṭha leh tling apiangte lak an nih dawn thu Home Minister-in a sawi.

Home Minister-in police constable atan a tling leh ṭha apiangte lak an nih dawn thu a sawi hi a lawmawm a; ṭhalai, hna zawng mekte tan a lawmawm lehzual ngei ang.

Tun hmain Mizorama police laknaah dik lo taka thil tih a awm nasaa sawi a ni ṭhin a; 'Lo teh rawh u ka ti lo, lo la rawh u ka ti alawm' tih ṭawngkamte pawh titi-ah sawi a awm tawh ṭhin. A zialo tak zet a, police fel leh ṭha tak neih a harsa hle ang.

Police constable lakna kal mekah written exam result a chhuak tawh a, personal interview hmabak a ni mek. Personal interview hi induhsak theihna lai a ni a, insawipui hunah ngaih a ni fo. Tunah pawh insawipui a nasa viau tawh mai thei.

Minister leh MLA aṭangin a ni emaw, chhungte leh ṭhian ṭhate mai bakah, mi dangte aṭang pawhin insawipui a awm ngeiin a rinawm a; mahse, Home Minister-in a lo sawi tawh angin, tun ṭuma police laknaah hian thiamna leh theihna hmanga a ṭha leh tling apiang lâk ngei ni rawh se.

Sorkar hna thawk tur lak dan dik lo, a thiam apiang la loa induhsakna awm ṭhin hi ṭhalai lehkhathiamte tibeidawngtu a ni ṭhin a, a pawi hle. Ṭhalaite'n inelna 'fair' taka an hmachhawn a, sorkar hnathawk laknaah a ṭha leh thiam apiang lak an nih zel theih nan sorkar hian hma la zel rawh se.

Home Minister vêkin, an sorkarah sorkar kal tawhte lakah aiin mipuiin an beisei sang zawk tih a sawi. Mipuiin tun sorkar an beisei sang bik a nih chuan, police lak danah pawh sorkar kal tawhte aiin an beisei sang ngei ang a, dik taka ti turin an beisei ang. Mipui beiseina chu sorkarin thil dik leh thil ṭha tih hmangin a chháng lêt tur a ni.