Kawng chhe lutuk awm lo tura hmalak

Truck neitu pawl Mizoram Truck Owners Association leh truck khalhtu pawl Mizoram Truck Drivers Association te chuan Mizoram mamawh tinrêng lak luhna kawngpui pawimawha Buichali leh Sairang inkara kawng chhe zual laite chu May 23, 2025 (Zirtawpni) thlenga thawm ṭhat a nih loh chuan truck-te dintir an tum tih an puang.

MTOA leh MTDA tarlan danin, Buichali leh Sairang inkarah kawng chhe zual lai hmun thum/li-ah a awm a; chung kawng chhe zual laiahte chuan tun hnaiah truck a tlu nual tawh. Lirthei lian rit phur tana tlan a harsat bakah, chetsual a hlauhawm avangin thawm ṭhat a nih loh chuan an tlan ngam tawh rih lo a ni.

Sairang leh Buichali inkar hi thui tak a ni lo a, km. 20 vel emaw niin a sawi. Hemi chhunga kawng chhe zual lai, truck tana hlauhawm zual chu hmun pathum/pali emaw chauh a nia sawi a ni bawk.

Kawng chhe zual lai an sawi hi a chhe tak tak ngei a; chutih rualin, truck-te an la tlân lui hrâm hrâm thei tho. Truck neitute leh khalhtute'n kawng chhia vanga truck-te dintir an tum hi sorkar nawrna a nih a rinawm.

Truck enkawltute'n truck dintir hmangin sorkar an nawr emaw, nawr lo emaw, Mizoram châk lâkna kawngpui pawimawh ber lirthei tana tlân hlauhawm thei khawpa a chhia hi chu a dik lo.

Kawng pawimawh ber chhe zual laite thawm ṭhat thuai a nih theih nan sorkarin hma a la tur a ni a; kawngpui siamtu company lam enkawl lai a nih pawhin an thawm ṭhat vat theih nan sorkarin na takin a nawr tur a ni. Chutih rualin, truck enkawltute lam pawh, an duhthusam ang taka chaka thawm ṭhat a ni lo a nih pawhin, mipui harsatna tawh theihte hre rengin nuar lo se a duhawm.

Fûr a inṭan dawn chauh a, fûr tak tak hma aṭanga Mizoram mamawh tinrêng lâk luhna kawngpui pawimawh berah harsatna kan tâwk nghal der mai hi a zialo hle mai a; fûrpui tak tak a huphurhawm nghal hle.

NH kawngpui ṭha lo leh hmun tam taka chhe lutuk vangin nikum lamah Mizoramin harsatna kan tâwk nual a, kawng chhia vanga truck tlantir loh a awm nual mai. Kuminah hian nikum anga kawng chhe lutuk a awm tawh loh nan leh lungawi lohna lantir hial ang kha a thlen tawh loh sorkar hian chak takin hma la rawh se.