Innghahna tlak mipa an tlem em?

Kumin HSLC leh HSSLC-a top 10-a tling hmeichhiate State Hub for Empowerment of Women-in May 20, 2025-a lawmpuina hun a buatsaihah Social Welfare leh WCD enkawltu Minister chuan Mizo mipa rintlak leh innghahna tlak an tlem tawh thu a sawi.

Minister thusawi hi Mizorama chhungkuate leh mipate inenfiahna tur pakhat chu a ni ngei mai a; chutih rualin, thu a sawi dan erawh a fuh tâwk lo deuhin a lang. Mizo mipa rintlak leh innghahtlakna an tlem tawh ti zawnga sawi loin, Mizo mipa zingah innghahna tlak loh an tam tawh ti zawngin sawi se a dik zawk âwm e.

Mizo mipa zingah rintlak leh innghahna tlak an la tam em em a, tlem tial tial loin an pung zel zawkin a rinawm. Khaw tin leh veng tinah mipa rintlak leh innghahna tlak an tam em em a, rintlak loh leh innghahna tlak loh aiin an la tam zawk fê ngei ang. Chutih rualin, innghahna tlak loh erawh an pung ve zel tih erawh phat tur a awm lo.

Mizo mipate innghahna tlak an tlem tawh ni loin, innghahna tlak loh an pung tial tial a, an tam sâwt ti zawnga sawi chi a ni ang. Thusawi dan a pawinmwhzia a lang a, fimkhur hle a ṭul, ram hruaitute tan a ṭul lehzual.

Thil rêng rêngah a ṭha lam aiin a chhe lam a langsar ṭhin a, a ṭha za zinga a ṭha lo pakhat pawh a langsar viau thei. Mi ṭhenkhat chuan a ṭha lam hmu fuh thei lo leh hmuh fuh duh loin, a chhe lam an hmu thei em em a, an sawi uar ṭhin a; thil nihna dik tak aia uchuakin an sawi ṭhin a ni.

Mizo hnam hmasawn zelna tur kan duh tlang a, mahni tâwk ṭheuhah ṭhahnem kan ngai tlang. Kan ṭhahnemngaih danah inenfiah fo a ṭha. A chhe lam tih lansarh hi a ṭha lama hmang ṭangkai thiam tan chuan mite tiṭangtu a ni thei a, thil ṭha zawk thlentu a ni thei; chutih rualin, ram leh hnam tan thil ṭha lo zawk thlentu a ni thei bawk.

Mizoram leh Mizo hnam chungchangah hian thil nihna dik tak ngaihtuah chungin thil ṭhate leh ṭha lote hi sawi chin tâwk neih a ṭha e.