Ruihhlo ngai enkawlah tih dan thar
Social Welfare Minister chuan May 21, 2025 khan a pisaah ruihhlo ngaite enkawlna hmun lian pahnih–Ṭawngṭai Bethel Camping Centre leh Operation Kingdom Ministry hotute a kâwm a; inkawmna hian rah duhawm tak chhuah ngei se a duhawm.
Inkawmnaah hian Minister chuan, sorkarin dan angin home/centre hrang hrangah accreditation a kalpui tawh dawn a, dan hnuaiah minimum standard zawm a nih theih nan sorkarin home/centre-te chu training pek a tum thu leh kawng hrang hranga puih a tum thu a sawi. ṬBCC leh OKM hotute pawhin dan hnuaia inkaihhruaina mumal tak nena kal a ni tur chu an lawm thu an sawi bawk. Minister-in a sawite hi a tak taka kalpuia tihhlawhtlin ngei ni rawh se.
Mizorama home/centre ṭhenkhat chuan sorkar thawhpui an duh lo a, sorkar aṭanga puihna, a bikin Mizoram sorkar aṭanga puihna dawn an duh loa sawi a ni ṭhin. Hei hi dan anga kal an duh lohna lantirtu a ni thei a, thil dik lo tih tumna vangah pawh a ngaih theih hial âwm e. Minister nen an inkawmnaah dan hnuaiah inkaihhruaina mumal tak nen kal a ni tur chu lawmawm an tih thu an sawi ta hi hmasawnna pakhat a ni.
Ruihhlo ngaite enkawl hi ruihhlo dona atana ṭha leh ṭangkai a nih ngei a rinawm a, hemi lamah hian nasa lehzuala ṭan lak a ṭul. Ruihhlo ngaite enkawlna lamah sorkar hi a lo muthlu rei deuh a nih pawhin, tunah chuan a harh chhuak ta niin a lang a; nasa zawkin ṭan han la mawlh teh se.
Ruihhlo dona leh ruihhlo ngaite chhan chhuahna turah tih theih leh mawhphurhna nei vek kan nih karah hian sorkar tih theih leh mawhphurhna a lian berin a rinawm. Sorkarin mawhphurhna tak tak a lak a ngai a, dan awm sate a nihna ang taka a kenkawh a ṭul.
Kohhrante'n ruihhlo ngaite chhan chhuak turin nasa takin hma an la tawh ṭhin a, chungte chuan awmzia a nei ṭhin ngei ang. Kohhran hi ruihhlo ngaite enkawlna hmun din tura ding a ni lo a; chutih rualin, chanchin ṭha hril tur te, thlarau bote chhan chhuak turte hian kawng hrang hranga hmalak theih a nih angin, rawngbawl dan ṭha zawk leh awmze nei zawk tur ngaihtuah zel se a ṭha hle ang.