Myanmar aṭanga rawn lutte chhinchhiah
Lunglei Electric Veng Local Council chuan tun hnai aṭanga an veng chhunga Myanmar aṭanga raltlan awmte Myanmar identity card laksakin an kawlsak. Hei hi raltlante'n zalen tak leh an duh duha Mizoram leh Myanmar an an kàr tawn chhen lohna tur a ni.
Myanmar aṭanga raltlante zalen taka an duh duh anga an awma an chet lohna atan khua leh veng eng emaw zat chuan khuahkhirhna an lo siam tawh hlawm bawk a; khua/veng eng emaw zatin hma an la mek bawk.
Zalen taka ram pahnih kàr tawn chhen an duh loh chhan bera an sawi chu ruihhlo tawlh rûk venna atan tih a ni a; thil tih àwm tak leh awmze nei a nih ngei a rinawm.
Raltlante hnawk tihna a lian sawt viau niin a lang a; hei hi a chhan ber chu–ruihhlo a hluar phah nia ngaihna te, sualna dang dang a tam phah nia ngaihna te, sumdawnna lama hnawk tihnate leh chanvo chhuhsaktu tura ngaihna vangte a ni tlangpui awm e.
Myanmar lam aṭanga sahimna zawnga kan rama rawn lut mi tam tak an awm a, an raltlan a ngaih hma pawhin Myanmar lam aṭanga rawn lut mi eng emaw zat an awm bawk. Kan ṭhenawm ram aṭanga rawn lutte hi a fel leh sual an kat nuk dawn a, kan unaute pawh ni mah se India khua leh tui an ni lo tih hi vawn tlat a ṭul.
India khua leh tui nihna hian ham ṭhatna ṭhahnem tak a keng tel a, chutihrualin tuna Mizorama awm sa Mizote hian kan kham khawp meuh lo thung. Hei vang tak hian khua leh tui nihna hlutzia hi kan hriat a ṭul a, Myanmar aṭanga rawn lutte tana Aadhaar Card emaw Voter ID emaw siam sak tuma hmalakpui hi sual lian taka ngaih hmaih tur a ni.
Veng leh khaw hrang hrangin India khua leh tui nih hlutna hriaa hma an la hi a ṭha a, Lunglei Electric Veng Local Council-in Myanmar identity card laksaka hma an la pawh hi a fakawm hle. Chutihrualin hmathlir thui tak neih a ṭul a, Myanmar aṭanga rawn lutte fel fai taka chhinchhiaha Mizorama an inbengbel theih lohna tura ruahmanna siam hi a pawimawh hle.
Mizo hnam hmalam hun hriltu a nih avangin sorkar anga ruahmanna ṭha tak siam a, veng/khaw tinin an zawm tlan vek hi a pawimawh viau bawk.