Aikal late hrem ngam ngei ni se

MZP chuan Mizoram sorkar sikulah aikal la mi 22 an la awm thu May 21, 2025 khan an puangzar a; aikal late chungah June 13, 2025 ral hma ngeia action la turin Mizoram sorkar an ngen.

Zirtirtu aikal la mi 22 an awm thu MZP-in an puan hi sorkara thuneitute'n an bawhzui nghal. School Education department hotute chuan, aikal late chu tute nge an nih an zawh chian thu te, MZP-in list an neihte chu bialtu DEO leh SDEO te bawhzuitir nghal an nih thute an sawi.

Zirtirtu zingah aikal la an awm lohna tura MZP ṭhahnemngaihna leh hmalakna a lawmawm. Zirlai pawlte hi an hmalakna ṭhenkhatah miin an sawisel fo laiin, zirlai leh zirna kaihhnawiha an hmalaknate mipuiin an pawmpui viau ṭhin niin a lang. MZP hian zirlaite hamṭhatna leh zirna hmasawnna tur hi ngaih pawimawh berah neiin hma la zel se, zirtirtu aikal la chungchang pawh bawhzui zel rawh se.

Zirlai pawlte'n zirtirtu aikal la eng emaw zat an la awm thu puanzar hnu lawka sorkar lamin an bawhzui nghal pawh a lawmawm. Chak takin bawhzuiin, tute nge an nih tih te, aikal an lak chhan te, harsatna an neihte chhui chhuak vat se; sorkar thupek zâwm lotu hrem tlak an awm a nih hrem ngei teh se.

Hetih rual hian, zirtirtu aikal la tihtawp vanga harsatna tâwk sikul an awm thei a, zirtirtu indaih lo lutuk phah sikul pawh awm theih a ni. Chutiang chu a awm leh awm loh sorkar thuneitute'n chîk takin ngaihven se, zirlai naupangte'n an tawrh loh nan chak taka hmalak zung zung a ṭul ang.

Sorkar hotute'n sorkar hnathawk aikal la hriate chu thuneitute hnenah hriattir turin an lo chah tawh ṭhin. Sorkar hnathawk aikal la hriate thuneitute hnena hriattir tur tihah hian fimkhur a ṭha. MZP hmalaknaa zirtirtu aikal la anga report zingah Mizoram sorkar hnuaia thawk ni lo te, aikal la si loa aikal la anga report-te a awm a; hei hian fimkhur a ṭulzia a tilang. Dik lo taka intihmualpho a awm loh nan fimkhur a ṭul e.

Mizoram sorkar ding mekin sorkar hnathawk aikal lak an remtih loh thu an puangzar fo a, media hrang hrangah nasa taka tihchhuah a ni tawh. Heti chunga zirtirtu aikal la an la awm fo hi a zialo a, sorkar thu awih lohna lian tak a ni. Sorkar hian namnûl mai lo se, kum khat chuang kal taa an lo puanzar tawh a ni bawk a, aikal late chungah action lain hrem ngam ngei rawh se.