LGBTQI chungchangah fimkhur ila

Social Welfare Minister hoin May 23, 2025 khan Home department leh Health department hotute leh, Mizoram Psychological Association leh Mizoram Professional Social Workers' Association hruaitute an ṭhukhawm a; Mizorama Lesbian, Gay, Bisexual, Transgender, Queer, Intersex, etc. (LGBTQI+) awm zat hriat a nih theih nan zirchianna (survey) neih tum a nih thu tarlan a ni.

LGBTQI tih lampuma a awmzia hi a inhnaih hlawm hle. Lesbian chu hmeichhia leh hmeichhia inkawp an ni a, gay chu mipa leh mipa inkawp an ni. Bisexual chu mipa leh hmeichhia kawp thei ve ve an ni a, transgender chu mipa/hmeichhia nihna thlakte an ni. Intersex chu serh nihphung pangngai lo, danglam bik sawina a ni a; queer chu mipa/hmeichhia nihnaa harsatna neite sawina niin mithiamte chuan an sawi.

LGBTQI hi khawvel ram tam tak, a bikin khawtlang lam ram, ram changkang zawkte'n an pawh viau tawh a, an hamṭhatna tur pawh an ngaihtuah nasat bakah, an thlavâng an hauh nasa viau tawh. Ram eng emaw zatah mipui náwlpuiin an la hrethiam lo ve tho bawk.

Mizo mipui hian LGBTQI chungchangah hian eng rilru nge kan put ang a, kan ram leh hnam tan eng nge ṭha ber ang tih ngaihtuah thiam a harsa viau. Tuna a lan danah chuan Mizo mipui tam ber chuan an la ngaithei lo deuh niin a hriat.

Mihringte hi mipaah emaw, hmeichhiaah kan piang vek a, Pathian thu aṭang phei chuan mipa leh hmeichhia bak kan awm thei lo; Pathianin mihringte hi mipaah leh hmeichhiaah a siam tih a ni.

Mizorama LGBTQI awm zat zirchianna kalpui tur hi kan ram, Mizoram tana ṭha zawk tur nge ṭha lo zawk tur tih hriatthiam a har rih viau a; mipui rilru pawh a phîr hlein a rinawm. Zir chiangtu turte leh sorkar an fimkhur viau a ṭul.

Ram changkang zawkte'n LGBTQI an pawm avanga lo pawm ve mai chu changkannaa ngaite pawh awm theih a ni a; mahse, LGBTQI pawm hi changkanna a ni lo kher tih hriat a ṭha. Diriam tur an ni lo a, hriatthiamna thui tak neih a ṭha a; chutih rualin, an thlavâng hauh lutuk erawh ram leh hnam tan a ṭha ber lo thei.

LGBTQI chungchangah hian ram leh hnam kal zel tur thlir chungin sorkar leh mipui fimkhur tlân a ṭul a; mihring nihna Pathian thuin a sawi dan leh Kristiannain a pawm dan te, Mizo mipui rilru sûkthlêkte uluk taka thlir chunga hmalak chi a ni.