Khualzin hîp nan Krimas lawmna

Tourism Minister chuan May 24, 2025 khan Bharat Mandapam, New Delhi-a 'Rising Northeast Investors Summit' ah thu a sawi a; Mizorama Kristmas lawm dan chu khualzin hîpna atan ram pawn thlenga tihlâr leh zawrh tlak a nih thu a sawi.

Mizoramah tun hma aṭanga tun thlengin Krismas kan lawm uar hle ṭhin a, khawvelah Krismas lawm uar berte zinga mi kan nih hial mai thei. Krismas hian Mizote thinlungah zûn a nei rit a, December thla tìr lam aṭangin mi tam tak rilru a phâwklêk ṭan tawh ṭhin.

Krismas kan lawm dan hi hnam dangte'n an lawm dan nen khaikhinin, a danglam viauin a rinawm a; kohhran tinin a ropui thei ang bera Krismas ruai kan ṭhehte hi a danglam em em. A bik takin ruai kan ṭheh dante hi hi hnam dang tan chuan thil danglam tak, hmuhnawm tak leh tel ve châkawm tak a nih a rinawm. Tourism Minister-in a sawi angin, khualzin hîp theihna remchang tak, khawvel puma hnam dangte hnena theh lâr tlak a ni àwm e.

Tunah chuan Mizote'n Krismas kan lawm dan hi khawvel mipui tam berin an la hre lo a, India ram chhunga mipui tam ber pawhin an la hre lo. Chuvang chuan, Krismas kan lawm dan hi hnam dangte hmuh theih turin kawng hrang hrangin thehdarh uar ila a ṭha hlein a rinawm. Chutih rualin, kohhrante'n rilru zau zawk kan put erawh a ngai ang.

Mizoram hian hnam dang khualzinte hîp thei khawp hmun mawi a nei ṭha tâwk a; a ram mite'n hmuhnawm ena kan en loh tam tak hi hnam dang, ram dang mite tan chuan hmuhnawm tak tak a tling. Chuti chunga khualzin dik tak kan la ngah tâwk loh chhan ber chu min la hriat loh vang a ni a, kan la intheh lâr tâwk tlat lo.

State danga khualzin tam takin an tlawh nasat hmun tam tak zingah kan rama hmun mawi kan neihte aia nêp zawk a tam mai. Mahse, khualzinte'n an tlawh ruih ruih a, sum leh paia hlâwkna pawh an tél nasa. A chhan chu, an inpho lan thiam vang leh khualzinte'n an hriat laklawh tawh vang a ni.

Kan rama hmun mawi tak takte leh Krismas kan lawm dante hi khualzin tam zawk hîp nan hman tum ila, ṭan i la tlang ang u. Sorkar, Tourism department pawh tun aiin ṭang lehzual se, awmze nei zawkin hma la rawh se.