Thenzawla khawpui lian din

Mizoram Chief Minister chuan May 24, 2025-a New Delhi-a NITI Aayog Governing Council vawi 10-naah telin, Thenzawlah mi nuai 10 aṭanga 15 vel chen theihna tur khawpui thar 'Peace City' din an duh thu a sawia tarlan a ni. Thenzawla khawpui lian din chungchang hi hun dangah pawh a lo sawi tawh.

CM sawi ang taka mi nuai 10-15 vel chen theihna tur Thenzawla khawpui lian din a sawi a, ram tana ṭhahnemngai taka ngaihtuahna a hmang hi a lawmawm. Chutih rualin, Thenzawl a ni emaw, hmun dangah pawh ni se, mi nuai 10 chuang chen theihna tur Mizorama din hi thil harsa tak a nih hmel a; a taka hlawhtling thei ngai lo tur, mumang ram an tih ang chi hi a ang lek lek thei zawk.

Kum 2011 chhiarpuiah Mizoramah mi 10,91,014 awmin, kum 2023 khan mi 12,50,000 awm anga chhût a ni a; Aizawlah kuminah hian mi 4,27,000 vel awm anga chhût a ni. Guwahati-ah khuan kuminah mi 12,24,170 an cheng anga chhût a ni bawk.

CM-in a suangtuah Thenzawla Peace City hi awm tak tak ta se, Mizoram mipui zawng zawng kan leng dawn tihna a ni a; tuna Guwahati khawpui tiat vel a nih a ngai dawn tihna a ni.

Aizawl hi tun dinhmun ang a nih theih chhan hi state capital a nih vang a ni ber a, tun dinhmun thleng turin hun a duh rei hle. Mizoram leh state danga khawpuite pawh tuna an dinhmun ang thleng turin hun rei tak, mihring chhuan eng emaw zat a liam a ngai.

Khaw dang aṭanga Aizawla mi an pêm luh chhan chu state capital a nih vang te, eizawnna, khawsakna leh nunphung a awlsama a nawm zawk beisei vang a ni tlangpuiin a rinawm a; khawpui lian tak ni tura duh vang hrim hrima pêm lut chu an váng viau àwm e.

Thenzawl hi khawpui lian tak, mi nuai 10-15 vel chen theihna khawpuia din tur chuan mi an pêm luh a ngai a, pèm luh chhan tur ṭha tak a awm a ngai a; eizawnna ṭha leh khawsakna atana awlsamna chi hrang hrang a awm a ngai.

Mi nuai 10 chuang chen theihna khawpui Thenzawla din hi a har viau dawn a, thil theih loh a ni zawk hial ang. Chutih rualin, CM-in a sawi ang zat mihring chen theihna khawpa lian khawpui din theih ni lo mah se, tuna a dinhmun mek aia lian fêa siam theih a nih pawhin a ṭha a; chumi tura sum tam tak sorkar laipuiin a rawn pe a nih phei chuan ṭha hle ang.

Khawi khua pawh ni se, la ṭhang zel thei leh mihring la pun zel theihnaah chuan khaw lian zawk a nih hun la thleng thei a nih avangin awmze nei taka kawngpui leh thil dang dangah ruahmanna mumal tak neih lâwk erawh thil ṭha a ni.