Fûr laiin fimkhur zual a ngai

India Meteorological Department-in May 28–June 3, 2025 chhungin Mizoram leh hmarchhak state ṭhenkhatah thlipui, ṭêk leh ruahpui thawk thei a nih thu leh May 29 kha nasa zual thei a nih thu a tarlang. IMD thlir lâwkna avangin Mizoram sorkar pawhin fimkhur lehzual turin mipui a ngen a, nimin khan sikul zawng zawng khâr a ni.

IMD-in Mizoram leh hmarchhak state dang ṭhenkhatah thli leh ṭêk thawk thei leh ruah nasa taka sûr theia a hmuh lâwk hun hi a la tawp lo a, a la kal mek. IMD-in khawchin a thlir lâwkna hi dik vek lo pawh mah se, tam tak a dik a; chuvangin, Mizoram mipuite kan fimkhur zel a ngai.

Mithiamte thuràwn anga sorkarin hma a la te, fimkhur tura ram mipui a chahte hi a ṭangkai hle a; ram, khawtlang leh mipui him tlànna tura sorkar leh mithiamte thuràwnte hi mipui pawhin a theih chen chenah kan zawm zel a ṭha.

Fûr a inṭan tawh a, tun aia nasa pawhin ruah a la sûr zelin a rinawm. Mizoram mipui fimkhur taka kan awm zel a, sorkarin tih tur leh tih loh tur a puan chhuahte ṭha taka kan zui a ngai. Sorkar pawhin fimkhur takin ṭan la zel se.

Khawtlang hruaitute'n mahni khua leh veng ṭheuhah khawtlang mipui himna turin mawh an lâk a ṭul a; VC leh LC ten sorkar thuchhuak, thuràwn leh ngenna ṭha takin bawhzui se, mipui hriat tur pawimawh hriattir leh zirtir kawngah ṭan an la zel rawh se.

In hmun tur leh thil dang atana lei lai mekte an fimkhur zual a ngai a, fûr lai hi chuan insûm deuh se. Sorkar pawhin fur lai hi chuan khaw chhunga lei laih hi chu khap rih se a ṭhain a rinawm. Keimahni mai bakah, ṭhenawmte leh mi dang tana chhiatna rapthlak tak thlen thei kan ni a, chutiang kan nih loh nan hmalak ṭheuh a ngai.

Fûr laiin mi tin, chhungkaw tin kan fimkhur zual a ngai a; kan fimkhur lohna vanga keimahni bakah, mi dangte tan harsatna leh chhiatna rapthlak tak thlentu ni lo turin i fimkhur ṭheuh ang u.