Hrisel nan vaihlo sim a pawimawh

Vawiin May 31 hi khawvel pum huapa vaihlo dona ni, World No Tobacco Day a ni a, vaihlo zuk leh hmuam bakah, vaihlo aṭanga thil siamte ṭhat lohzia, hriselna tichhetu a nihzia inzirtirna ni bik a ni.

Vaihlo zuk leh hmuam ti zat chhinchhiahna khawvel puma rintlak bera ngaih chu Global Adult Tobacco Survey (GATS) a ni a, kum 15 chin chung lam zinga vaihlo ti zat zir chianna a ni. GATS ṭum hnih neih a ni tawh a, kumin hian a vawi thumna (GATS-3) neih leh a ni dawn.

GATS-1 ah Mizorama vaihlo zûk leh hmuam ti ṭhin awm zat chu 67.2% a ni a, Mizorama kum 15 chin chung lam zingah a zatve aia tam daihin vaihlo an ti ṭhin tihna niin, India rama vaihlo ti tamna ber state kan ni. GATS-2 ah erawh chuan 58.7%-ah a tlahniam a, a lawmawm. GATS-3 neih turah hian hmasawnna ṭha tak nei thei ila a duhawm a, Mizoram mipui kan ṭan tlân a ngai.

Vaihlo zûk leh hmuam tih hi hriselna tichhetu a ni tih a chiang a; mithiamte chuan vaihlo zûk leh hmuamin cancer a thlen tih scientific proof a awm thu an sawi tawh ṭhin.

Mizote zingah cancer vei an tamzia kan hria; vaihlo tih nasat vanga cancer hluar berna state nih hi thil zahthlak a tling a, hnam changkang lo zia a ni pakhat ang. Natna tihdam harsa tak cancer vei kan tlem theih nan leh kan hnam kan hrisel zawk theih nan vaihlo zûk leh hmuam tih kan sim a ngai a; a dona lama ṭan kan lak ve pawh a ṭul.

Vaihlo ti tam tak chu sim duh, sim hleithei lote an ni. Sim turin beidawng loin theihtawp chhuah zel se, tum tak tak chuan theih loh a awm lo tih hre rengin ṭan la zel se a duhawm.

Media-ah vaukhànna thu tel loa mei zu lai tihlan danin a khap a; hei hi traditional media-te'n an zawm ṭhat viau laiin, Youtube-ah bawhchhia an tam niin a lang.

Mizo zingah Youtube channel nei pawh an tam hle. Youtube channel neite hian vaihlo kaihhnawih dan an hre ve tur a ni a, an zawm ngei tur a ni. Dan an hriat theih nan leh an zawm theih nan thuneitute pawhin hma la se a ṭha hle ang.