Chhiatna thleng aṭangin inzir zel ila

Tun hnai ni eng emaw ti chhung chu Mizoramah nasa takin ruah a sûr a, hmun eng emaw zatah chhiatna eng emaw zat a thleng. Mi panga laiin an thih phah a, hmun tam takah kawng a ping a, electric hmun eng emaw zat a chhe bawk. Hengte avang hian mipuiin harsatna kan tâwk a, a pawi tak zet a ni.

Leiminin kawngpui a hnawh avangin khualzin ṭhahnem tak an táng a, a bul hnaia khawtlangte'n buaipuiin, thâ leh zung mai bakah, sum leh pai sêngin ei tur leh riahnate an pe a; chhiat tâwkte ṭanpuiin mi tam tak an che suau suau bawk. Chhiatna karah Zo nun ze mawi tak a rawn lang chhuak ṭhin hi a hlu tak zet.

Electric hmunte hmun eng emaw zatah a chhia a, hmun tak takah kawlphetha inpek theih a ni lo. Ruahsur leh thli tleh vanga hmun hrang hranga kawlphethaa harsatna awmte siamṭha turin Power & Electricity department lamin theihtawp an chhuah tih an tarlang a; ruahsur karah chetsual hlauhawm tak hmuna kawlphetha siamṭhat tuma an che lai hmuh tur eng emaw zat a awm bawk.

Kawlphetha kan neih loh hian mi tam tak chu kan phun nghal mai ṭhin a, sorkar leh department kan dem a, kan sawichhe nghal ṭhin. Sorkar, Power department leh thawktute kan dem hma hian eng harsatna nge awm tih ngaihtuah hmasa ṭhin ila; khawi emaw laiah chhia a awmin siamṭhat tumin chhun leh zan sawi loin, ruahsur leh hlauhawm karah mipui tan rim takin an thawk ṭhin a ni tih kan hriatpui ve a ṭha.

Khuarel chhiatna thlengte hi tam tak chu kan pumpelh theih loh leh kan vèn sèn loh a ni a; kan ngaihsam vang leh harsatna la thleng theite kan ngaihtuah duh loh vanga chhiatna thleng, mihringin kan siam, 'man made disaster' nia ngaih theih tam tak a awm bawk.

Engpawhnise, ramin harsatna a tâwk a, indem hun a ni lo a, chhiatna tâwkte tawrhpui leh a ṭul anga ṭanpui hun a ni a, hetiang zawng hian rilru pu ila a ṭha hle. Indem hman kan ni rih lo a, politics thilah pawh indem nan hman chi a ni rih lo.

Kan hma hun lo kal zel turah keimahni leh kan ṭhenawm khawvengte himna tur hi thupuiah nei ila, kan hun tawn hi inzir nan hmang zel ang u. In kan sak danah te, tuichhia kan paih danahte fimkhur zual zel a ngai e.