Mahni huang china awm thiam

Chief Minister chuan, April 22, 2025 khan MHIP General Assembly a hmanpui a; mahni kuang lo nawr chíng an awm lek lek ṭhin thu sawiin, sorkar thil leh tlawmngai pawl thil thliar thiam a ṭul thu a sawi.

CM hian sorkar thlâwp reng turin NGO-te an beisei lo a, thawh dun a ṭulna hun leh hmunah ṭha taka thawh dun erawh an duh thu te, NGO tan sorkar thláwptu emaw, dotu emaw nih a ṭul loh thu te, NGO chu àwn lam nei lo an nih a ṭul thute a sawi a ni.

Chief Minister thusawi hi a pawimawh hle mai a, sorkar hotu te, tlawmngai pawl hruaitu te, sorkar hnathawkte mai bakah, mipui nâwl-puiin hriat reng ṭha.

Sorkarin tih tur leh mawhphurhna chin a nei a, kohhran leh tlawmngai pawlte pawhin din chhan leh tih tur chin an nei. Sorkar hnathawkte pawhin dan anga tih theih chin leh tih phal loh chin an nei bawk.

Sorkar, kohhran leh pawlte hian kan huang chin leh kan tih tur chin te, kan tih àwm te, kan tih atana mawi chinte kan thliar thiam a ṭul. Pawl anga kan huang páwn lam kan dai hian buaina a awm ṭhin a, kan tih tur bâk kan tih hian harsatna a thleng ṭhin.

Kohhran hi sorkar leh tlawmngai pawl thilah a inrawlh lutuk chuan a dik thei lo a, sorkar pawh kohhran leh pawl thilah a inrawlh tur a ni lo. Mi (pawl) dangte huang kan va dài hian kan va dài mi (pawl) dangte'n an lo ngaithei lo ṭhin a; buaina leh harsatna a awm phah ṭhin a ni.

CM-in a sawi angin, NGO chu NGO a ni a, kohhran chu kohhran a ni a, sorkar chu sorkar a ni. Mahni huang ṭheuh an nei a, an huang ṭheuh leh mawhphurhna chinah zel theihtawp se, kalphung dik a ni ang a, ram leh hnam tan a ṭha berin a rinawm.

Sorkar tih tur chin chu sorkar hotute kutah dah thiam a ṭul a, chutiang tura mipuiin rorel tura an thlan an ni. Kohhran leh pawlte'n mi leh sa an ngah hre râna sorkar thunun an tum chuan a dik thei lo. Chutih rualin, inpuih tawna thawhho thiam erawh ram leh hnam tan thil ṭha tak a ni thung.