Yoga leh Zoram politics

Mizoram chief minister leh MPCC president Lal Thanhawla chuan, "Yoga hi excercise ṭha tak ni mah se, a thil tum bulpui ber chu Hindu sakhuaa mi leh a ni. A exercise pawh a ṭha lutuk a, tih ve pawh a ṭha. Mahse, kan invéng thiam lo ang tih a hlauhawm," tiin yoga laka invên fimkhur a ṭul thu a sawi.

Central sorkar kaihruaitu BJP lamin India ram pumah yoga chawi lar an tum a, ram pawna Indian awmna thlengin yoga hi tihlar an tum. Mizoramah hian Hindu sakhaw vuantu an tam vak lo a, hei vang hian yoga hian sawi a hlawh a, Hindu sakhua nen sawi zawm a nih vangin mi tam tak chuan sorkar laipui chet dan hi hnawk an ti hle a ni.

Mizoram chief minister hi Congress party-a mi a ni a, Congress hi BJP hmelma ber an ni. Chief minister hian tlemlai deuh khan yoga chungchang a sawinaah thil hlauhawm a nih loh thu lam hawi deuhin a sawi ri zauh tawh a, mi tam tak chuan central sorkarin Mizoram a hrek a hlauh vanga BJP sawisel ngam lo ang hialin an puh hman a ni.

Tunah erawh a ki a dang ta a, yoga chu exercise ṭha tak a nih thu a sawi rualin a tum bulpui ber chu Hindu sakhuaa mi leh a nih thu a sawi chhuak ta. Chief minister thusawi ang hi mi tam tak ngaihdan ni sa mah sek, a sawitu azirin thil hi a rik dan a danglam ṭhin a, tunah chuan Mizoram chief minister-in yoga chungchanga a ngaihdan a puang chiang ta, tiin a sawi theih ang.

BJP hi Northeast Democratic Alliance (NEDA)-a dintu niin he mi hnuaiah hian Mizoram
aṭangin MNF an awm a, MNF hi Congress elpui ber an ni. Chief minister-in yoga chungchang a sawi chhuah hi BJP lam a beihna a nih rualin NEDA hnuaia awm MNF a beihna pawh a ni tel bawk a, hemi lam hawi inhnialna leh thu inchuh hi kan la hre dawn chauh a nih hmel.

Mizoramah hian politics-a thu inchuh leh lamṭang zawnnaah thil hrang hrang kan hre tawh ṭhin a, tunah hian yoga hi politics-a inhnialna thlentu a ni leh mai thei. Engpawhnise politician-te hian hetiang hunah hian dinna hi tichiang ṭhin se mipui pawhin an party kal danah ngaihdan kan siam fel thei ang a, dinna mumal nei mang lo leh sawi chiang lote, eng thil thleng emaw vanga ngaihdan sawh sawn thut ching political party kan awm ṭhin avang hian mipuiin politician-te chunga rinna nghah ngam hi harsa an ti ṭhin.