PWD insawifiahna mipuiin an pawm em?

Public Work Department (PWD) hotute chuan, "Kawng siamṭhatna tur sum kan neih tlem avangin harsatna kan tâwk," an ti a, kuminah lirnghingin lei a tithâwl a, ruahtui a tam bawk avangin kawng min a tam phahin an hria. Fur ruahtui a hulah kawngpui hi theihtawp chhuaha siam an tum thu an sawi rualin a siamna tur sum a harsat thu an sawi bawk.

PWD hotute hian tun hnaia Mizoram hmun hrang hranga kawngpui chhe lutuk avanga mipuite har-satna tawh chung-chang an sawi a, an insawifiahna a ni. Fur a rei tih hi mipuiin an pawm ang a, lirnghing vangin lei a thawla leimin a tam phah tih pawh hi finfiahna awm lo mah se mipui pawhin an hre thiam ang. Sum a awm lo tih erawh hi chu sorkar sum bawm kalphung hre ve lo leh, thil danga sorkar chet dan hmu si tan chuan hriatthiam a har deuh ang.

Engpawhnise Mizorama kawngpui hi chu a ṭha tak tak ngai meuh lo a, tun hnaia heti taka mipui an phun chhan hi ngaihtuah chian a ngai. Tun hma zawng aiin media a ṭha tawh a, tun hmaa kawng chhia ang tho emaw, kha aia nasa lo zawk pawh ni mah se, a thlalak nen a darh tawh chuan sorkar mualphona a ni lo thei lo. Hei aia chhan lian zawk nia lang chu sorkarin fur ruahtui tlak loh hun a tawngpawng nghah tawp mai hi a ni.

PWD lam hi kawngpui tlang lo tihtlang kawngah chuan an fakawm a, khawi lai hmun mah hi leimin vangin a ping rei tawh lo a, a rang thei angin an thian fai zung zung ṭhin. Hetihlai hian kawngpui chhuat chhe lutuk maite hi chu an en kan leh mai mai thung a, kawngpui pawimawh tak Aizawl leh Tuirial inkar chhe lutukte mai pawh a zualpui tal hnawh theih a nihlaiin an ngaihthah a, lirtheiin a tuar a, zin veivak mipuite tan a hrehawm hle.

Sorkar hian sum nei se, hnathawhna turin khaw ṭha chu nei se kawngpui hi an siam mai ang tih chu a chiang. An harsatna tawh an sawite hi mipui tan pawh hriatthiam theih tak chu a ni ngei ang a; nimahsela ngaihtuahtu nei lo ang maia kawngpui pawimawh chhuat chhe lutuk leh kal hleihtheih loh khawpa an hnutchhiah thei hi chu sum leh hun awm loh lam aiin inthlahdah lam rawng a kai zawk lo maw?